June 1, 2022 : Sialsuk PHC-a damlo enkawl lai Lalrengpuia, 37 damdawi in atanga chhuahtir a nih hnu lawka boral zui ta chungchanga Dr. Linda Lalbiaknungi chet dan chu chhui turin Health & Family Welfare Department chuan Aibawk BDO Chinlianmanga, MCS chu a ruat.

Lalrengpuia thih chhanah hian mipui lam chuan Dr. Linda Lalbiaknungi hian damlo enkawl lai hi a hnawtchhuak niin an sawi a, a chet mawi loh vang leh a thil tih kalphung dik loh vanga he thihna hi thlengah an ngai a, he thihna thlen chhan dik tak hi chhui chiang turin Aibawk BDO hi sawrkar chuan a hriattir a ni. 

Tunhnaia social media lama sawi hlawh tak Sialsuk damdawiina thil thleng chungchang vawiina khan Health & Family Welfare Department thuchhuah chuan Chinlianmanga hi chhui turin an ti a, Secretary, Health & Family Welfare Department hnenah June ni 10, 2022 ral hma in report thehlut tura tih a ni.

Social media thenkhata darh leh Sialsuk atanga ZALEN thudawnna chuan Sialsuk PHC a enkawl mek Lalrengpuia hi Dr. Linda Lalbiaknungi hian a pawisa ru-ah a puh a, thi ta hian a ruk loh thua a chhan hnuah PHC doctor hian damdawiin hi chhuahsan turin a ti a, Aizawl lam pan tura buaipui a nih laiin a thi ta mai niin sawi a ni. Lalrengpuia hi zun kawng kha lo niin, a zung hlei thei lo niin thudawnna chuan a sawi a, an thu inchuh chungchangah a hmuna awm anih loh avangin sawi vak tur a hriat loh thu leh pakhat zawk a thih tawh bawk si avangin tunge dik zawk hriat a har a rin tawh thu a sawi.