Naupangte tela mi 30 chuang phurtu lawng chesualah mi 10 chin hriat an la ni lo.

Bihar-a Muzaffarpur district-a Ningani chawhmaa thil thlengah hian naupangte hi an sikul kai tur an ni a, Bagmati River-a Madhupur Patti Ghat-ah an chuanna lawng hi a chesual ta a ni.

National Disaster Response Force team-in chhanchhuah hna an thawh zui nghal tih news agency ANI chuan a tar lang a. X-a video an tar lanah chuan ham puar chi NDRF lawnglengah mipa pali chuangin mipa pakhat, a hnunga oxygen bur ak chu luiah hian zawng turin a zuang lut lai a lang nghe nghe.

“Chawhma dar 11 velah NDRF Control Room-in Muzaffarpur bula Bagmati River-ah lawngleng chetsual thu a dawng a. Kan hriat veleh hian a hmunah kan team kan tir nghal a ni,” tiin NDRF Bihar unit-a an deputy commandant, Randhir Singh chuan ANI a hrilh.

“Thu kan dawn dan chuan lawngah hian mi 25-30 vel an chuang a, tual chhung thuneitute chuan mi 20 dawn chhanchhuah an nih thu an sawi a; mahse, hei hi a ni tak tak em tih finfiah a la ni chiah lo,” a ti.

“An chhanchhuah theih rih lohte zawng tur hian kan diver-te chu an che chhuak zui nghal a, thu thar kan la hriat belh rih lo va, hriat veleh puan a ni ang,” a ti bawk.

Chief Minister Nitish Kumar chuan officer-te leh district magistrate chu a hmuna kal nghal tur leh naupang chhungte puihna leh chhawmdawlna awm thei ang angte pe nghal thuai thuai turin a ti tih thuthar lakhawmtute hnenah a sawi.

“Chhanchhuah hna hi la thawh mek zel a ni a... District magistrate pawh rang taka che chhuak zel turin ka hriattir tawh a. State sorkar pawhin a tuartu chhungkuate chu a ngaihtuah zui zel ang,” a ti.

Chhanchhuah hna hi State Disaster Response Force-a mite pawhin an thawhpui bawk.