Ni hnih zet tharum thawhna nasa tak a thlen hnuah Manipur-a Imphal Valley leh a chhehvel chu Zirtawpni atang khan a ralmuang deuh tan ta a. State pawn atangin lirthei leh thlawhnain venhim hna thawktu tam zawk tirh luh niin hei hian boruak a tidai thei ta deuh.

Defence thupuangtu chuan mi 13,000 vel chhanchhuah an nih tawh thu leh army camp leh hmun him dangah dah an ni tih a sawi a. Churachandpur, Moreh, Kakching leh Kangpokpi district-ah sipai thleng tawhin ‘boruak thunun an tum’ tih a sawi.

Hetih lai hian phaikuam chhehvela tlangram district hrang hrangah hel pawl leh venhim hna thawktute inkahna a thleng.

“Darkar 12 liam ta chhung khan Imphal East leh West district-ah in hal leh kawng dan tum an awm nual a; mahse, tunah chuan heng boruak sa zual hi thunun tawh a ni,” tiin Zirtawpni zan khan defence thuneituin a sawi.

Manipur-ah hian Army leh Assam Rifles sipai 10,000 dawn tirh an ni tawh a. Nilaini atang khan phaia cheng Meitei leh tlangrama cheng Kuki inkarah buaina chhuakin tharum thawhna a thleng nasa hle a ni.