ZALEN February 1, 2025 : Labour, Employment, Skill Development & Entrepreneurship (LESDE) Department Minister Lalnghinglova Hmar chuan nimin tlai khan New Delhi-a Kaushal Bhawan-ah Union Minister for Skill Development & Entrepreneurship (MSDE) Jayant Chaudhary a hmu a, MSDE kaihhnawiha Mizoram hmalakna leh mamawhte an sawi dun.

Lalnghinglova Hmar chuan MSDE hnuaia Sports Sector Council (SSC) chu hmang tangkai turin Mizoramin hma a la mek tih Union Minister a hrilh. Mizo thalaite tuina leh thiam zawng pahnih, skill leh sports suihfin theih dan awm chungchangah SSC hotute nen an indawr mek thu leh February thla chhunga Mizorama meeting neih an tum thu a thlen a; Union Minister chuan Mizoram LESDE Minister hmalakna chu tha a tih thu leh puih a inhuam thu a sawi a, amah pawh March thlaah Mizoram-a zin a tum thu a lo hrilh.

Minister pahnihte hian PMJVK kaltlanga LESDE Department project thehluh chungchang te, PMKVY hnuaia Mizorama skill development training kalpui mek dinhmun leh hmalak ngaihna laite pawh an sawi dun a ni. 

Lalnghinglova Hmar chuan nimin tlai vek khan Surinder Bhagat, Jt. Secretary to Govt. of India, Ministry of External Affairs (MEA) pawh hmuin ram danga Mizo hnathawkte’n harsatna an tawh thin hrang hrang an sawi dun. Minister chuan Mizo thalai ram danga hna thawk turte chu dan hnuaiah him takin kal se a duh thu leh, Emigration Act, 1983 hnuaiah Mizoram Sawrkar chu Registering Authority-a awm an duh thu a thlen.

MEA hotute chuan Register Authority dil theih dan sawifiahin, MEA leh LESDE Department atangin bawhzuitu tur official an ruat nghal a; tihhlawhtlin a nih hunah LESDE department chu Mizoram atanga dan anga MEA kal tlanga ram pawna hnathawk tur thawnchhuaktu an ni thei dawn a ni.