Aizawl : Tuirial Bial Bye Election atana campaign mek  MNF Adviser Robert Romawia Royte chuan Skywalk leh Ropeway siamna tur sum a chingpen niin a sawi, Lok Ayukta emaw CBI emaw chhuitir a ni tur thu a sawi.

Lungdaia thu a sawi naah Robert-a hian, “Lungdai ram chhung Sakawrhmuituai Tlanga Skywalk project chu Chaltlang leh Durtlang inkara Ropeway siam turah hnathawh hmaa Rs 1,200 Lakh chuang kum 2018 hma lama released tawh ni si, a taka sum hman mumal a awm loh avangin ministry-in sum a rawn release duh tawh lo. Sakawrtuichhun Skywalk atan pawh Rs 245 lakh lai hnathawh hmuh tur awm mang si lovin kum 2018 hma lamah released a ni a. He project pahnihah hian contractor hi hna a thawh loh avangin a sum lak tawh kir turin vawi duailo Department-in a hrilh tawh chungin Mizoram pawh a rawn zin duh tawh lova. Dan angin hma kan la zel a, Cheng nuai sang chuang chingpen nia a lan avangin Lok Ayukta emaw CBI emaw kuta pek mai kan ngaihtuah mek ta a ni,” a ti.

Robert Romawia chuan, "Bye Election dawn mek laiin Lungdai mipui zingah social media-a inbeihna leh insawiselnate a awm avangin vawiinah hian thudik puan a tul ta a ni," a ti. Ropeway chungchang hi dan kengkawhtute kuta dahfel a nih chuan Sakawrhmuituai tlanga Tourism project pawh hi tha taka kalpui zel a nih tur thu a sawi bawk.

MNF Adviser Roberta hian Tuirial biala MNF Candidate K.Laldawngliana chu Kohhran leh khawtlang duh zawng chi, lehkhathiam leh tho thang tha a ni a, Bial tana sorkar au eih thei ber tur hi lo thlangtling hram turin mipui te a ngen, niin MNF thuchhuak chuan a tarlang bawk

MNF Candidate K.Laldawngliana pawhin thusawiin Lungdai mipui leh Tuirial bial mipuite chu anmahni tan rawng a bawl theihnan amah chu vote hram turin a ngen ve bawk a ni.