Skywalk/Ropeway chhuitu tur thutlukna la siam lo

Admin - Nov 28, 2021

Party pathum ten chhui duh vek

Aizawl: Mizoram Lokayukta Chairman C. Lalsawta IAS (Rtd) chuan Swadesh Darshan Scheme -II (skywalk/ropeway) hnuaia hmalakna chungchang complaint an dawn chu Anti Corruption Bureau (ACB) nge Central Bureau of Investigation (CBI) a chhuitir dawn tih thutlukna a la siam loh thu a sawi.

MNF party atanga complaint an dawn chungchangah ZALEN zawhna chhangin C. Lalsawta chuan CBI chhuitir a nih dawn chuan state sawrkar atangin chhui phalna an rawn dil a ngai dawn tih sawiin, thutlukna siam a la har rih thu a sawi. "ACB ka chhuitir dawn em ni ang, nge CBI ka chhuitir dawn, preliminary inquiry ACB ka ti phawt ang a, chumi zawhah CBI tih te pawh ngaihtuah tham a la ni," a ti.

Mizoram Lokayukta chuan thubuai lut chhuitu tur thawktu a la neih loh avangin ACB-ah an thawn thin a, thubuai lian zual ah chuan CBI hnenah pawh thubuai an thawn thei bawk.

Media hrang hrang a tarlan tawh angin, November 22, 2021 khan MNF party-a Vigilance department leh Legal Board-te chuan Sakawrhmuituai tlanga skywalk leh Chaltlang-Durtlang inkara ropeway siam chungchangah Lokayukta-ah complaint an thehlut a. "Dan bawhchhia an awm a nih chuan dan hnuaiah hrem an nih ngei theih nan a rang thei ang bera hma min laksak nghal turin Mizoram Lokayukta kan ngen a ni," an ti.

Mizoram Pradesh Congress Committee (MPCC) pawhin thuchhuah siamin, Swadesh Darshan Scheme-II hnuaia skywalk leh ropeway siam chungchanga thil fel lo awm nia lang chu CBI chhuitir ngei ni se an duh thu an lo tarlang tawh a. ZPM leader Lalduhoma pawhin, Sakawrhmuituai tlanga skywalk project leh Durtlang-Chaltlang ropeway pamtul chhanah Congress leh MNF party-te an inpuh tawn mek tih sawiin, zahthlak a tih thu leh Kristian zia lo hlea a hriat thu a lo sawi tawh bawk.

Share now