Aizawl: Aizawl Smart City hmalakna-in nimin khan Khatla, Chawnga Road, Presbyterian Biak In thlang kawng kual zau laiah 'Streets for people' campaign neih a ni a, Aizawl Smart City Limited chuan mipui te smart city simpui turin an ngen.

He hmlakna atan hian helai hmun kawng kam hmun awl laiah thut hahchawlhna hmun leh naupang infiamna hmun te an siam a, a duh tana ei in lamna tur Food Truck te an chhawp a, a mamawh tan BP enna leh inbukna te dah a ni bawk. 

Aizawl Smart City Limited chuan, "Aizawl khawpui kawng kam hmun awl te hi lirthei hun nan hman a nih deuh zel a, mi nawlpui tan chawlh hahdamna tur te, hawi thawvenna tur tha a awm theihnan kan hmun awl kan la neih chhun leh siam belh theih ang angte mipui nawlpuite tana ṭangkai zawka hman a nih theih nan khawtlang hmun-hma neitu, khawtlang hruaitute leh ram hruaitute mai bakah mipuite pawh ngaihtuahna thar senga khawpui nuam leh changkang zawk (Smart City) siampui turin mitin kan ngen a, thawhho puiah kan sawm a ni," an ti.

He hmalakna hi Khawpui changkang dangte anga kawngpui kam leh hmun awl remchang lai awm theite mipuite tana hman ṭangkai a nih theih nana inkawhhmuh tumna (campaign) a ni a. hetiang hi buatsaih a nih theih nana khawtlang hruaitute leh thuneitu sangte hnena ngaihtuahna thar seng tura infuihna leh inngenna “campaign” a ni.