Mizoram khaw lian deuhah chuan tunlai hian police lamin hmaituamna vuah loa khawlai chhuak te lakah dan kenkawh an tum hle a. Hmun thenkhat hulum lai bakah kawng penhleh deuh thlengin an luhchilha, hmun thenkhatah chuan sumdawngte dawrah luhchilhin pawisa an chawi tir tawh bawk a. Vantlang hmuna social distancing ti lo te pawh pawisa chawi tirin an hrem thin tawh bawk a ni.

Hripui darh zel tur venna atan kaihhhruai nain a phut angin, pawn chhuak leh vantlang hmuna kalte te chu hmaituamna vuah tur leh social distancing ti tha tur an ni a. Man chawia mihring phur chi lirthei pawh an phurha te hman tur kut tihfaina (hand sanitizer) pai tura tih an ni bawk a. Heng ruahmannate hi kan za vaia kan him tlan theihna tura duan a ni a, a zawm lote chu dan hmanga hrem theih an ni tawh avangin police lamin vaiin ‘flying squad’ te an chekual reng bawk a ni.

Hetianga tan lak a nih lai hian TV leh chanchinbu thlalakah te kan ramhruaitute leh sawrkar mi pawimawh zawkte hmaituamna hmang tha lo leh social distancing ti lem lo a lang fo bawk a, hei hi a ngaimawh awm tawh viau a ni. Tuna danin a phut ang chuan anni pawh hi pawisa chawi tir tur an ni a. Mipui dan zawm tura an phut dawn a nih chuan kan hruaitute hi entawn tura an awm a ngai a, mipui zirtirtu tur zawk an ni tih an hriat nawn fo a pawimawh a, an tih hram hram a ngai a ni.

Zirbingna a awm zela, covid 19 hrik chu boruakah mi thiamte rinaiin a cham rei thei tihte a ri chho zel a, puipunna hmunah phei chuan invenna tih that lehzuala fimkhur a ngai tual tual dawn tih a lang a ni. Indian Medical Association, Mizoram chuan chhiat ni leh inneih inkhawmah hmaituam leh social distancing tih tha lo bakah phal zat aia tam an pungkhawm thin an ngaimawh thu tunhnai khan an sawi tawh bawk a, sawrkar chu hmala tura ngen an tum bawk a ni. Sawrkar pisa hmunpui leh a pisa dangte pawh vantlang hmun an nih avangin a hnathawk te pawhin hripui thehdarh leh inveng tura tan an lak a ngai khawp a, dan an zawm leh zawm loh viltu an awm loh chuan an inthlahdah palh thei a ni. Kan police te hian hmun danga khauh taka hma an lak ang hian heng hmun te pawh hi an vil chhoh zel a tul e.