ZALEN December 3, 2024 : Aizawl Municipal Corporation chuan tunlaia information hriatchian tawk loh avangin social media kaltlanga AMC sawichhiatna a darh chu pawi an ti a. Mipui ten thudik an hriat a tul tiin thil awmdan an sawifiahna an nei.

AMC chuan, "AMC Board of Corporators thukawm-in kum 2024-2025 budget-ah Corporator fund atan Rs. 40 lakh pawm anga sawi hi a dik lova; Sawrkar kum 2024-2025 chhungin Ward Development Fund atan Rs. 665.00 lakh, Corporators 19 (sawm pakua) ten Rs. 35 lakh theuha hman tura dah a ni," an ti

"Sawrkar kum 2024-25-ah hian ULB Grants 2023-2024 1st Installment bak Central 15th Finance Commission atangin dawn a la ni lo a, chuvangin Cheng nuai 35 atangin Cheng nuai 10 theuh Corporators te Ward Development Fund atan pekchhuah a ni tawh a. Budget a dah hi pawisa awm sa a ni lo a, Central leh State Sawrkar atang sum dawn a nih hma chuan hman tur a awm lo a ni. Property tax khawn kal lai mek a la nih bawk avangin sum a la awm lo a, a awm hunah pekchhuah a ni dawn a ni," an ti bawk.

AMC chuan, "Kan hriat theuh angin ruahtui tla nasa lutuk avang te, Cyclone Remal thawk avang tein kum dang aiin hnathawh a sawt lo a. Tin, chhiatna kan pumpelhnana Aizawl khawpui chhungah lei laih khap a ngaih avangin fur laiin hna a timuang lo thei lo a ni. Amaherawhchu, tunah hian working season a intan tawh a, AMC chuan chak lehzualin hna a thawk thei tawh dawn a ni. Ward Development Fund hi mipui tan tangkai takin a hmang zel ang," an ti.