Aizawl September 4, 2023: Hnahthial District Bawrhsap Chuauhnuna kaihhruaiin vawiin khan DC Conference Hall-ah Mizoram Journalist Association (MJA), Hnahthial te nen inkawmhona neih a ni a, Hnahthial Bawrhsap chuan Social media chak tawh takah Journalist-te pawimawhna a nep phah lo a, thudik hailanna kawngah an pawimawh zual sauh a ti.

Vawiin thutkhawma hun kaihruaitu Bawrhsap Chuauhnuna chuan thuthar lakhawmtute chu sawrkar leh mipui inkara palai hna thawktu an ni, a ti a. Mipuite hnena thudik leh tluantling phochhuak thintu an ni tiin District inrelbawlna a an mawhphurhna hre reng a, thudik thehdarh kawngah leh mipui hrilhhriatna kawngah tan la thar turin a fuih. Mipuite hnena thudik puanchhuah kawngah thawhho puiah sawmin kawng engkimah inngaichang tawna thurawn inpe tawn thin turin a sawm bawk. Tunlai khawvel Social media chak tawh takah Journalist-te pawimawhna chu a nep phah lo tiin thudik hailanna kawngah an pawimawh zual sauh a ti a, ram leh hnam, khawtlang tan infinchhuah tawn a, thurawn inpe tawn tur leh thahnemngaihna tak tak nena thawhpui zel turin a sawm bawk a ni.

MJA Hnahthial President F Zosangliana pawhin thu sawiin DC-in thuthar thehdarhtute ngai pawimawh a hun tha tak a ruahman sak avangin lawmthu a sawi a, hun lo kal zel turah pawh thawhhona tha tak nen an kal ho zel a beisei thu a sawi bawk. Member dangte pawhin an ngaih pawimawh leh mamawhte DC hnenah an thlen a, ram leh hnam, District hmasawnna tura lungrual taka hmalak tlan an duh thu an sawi a ni.

Vawiin thutkhawmah hian District hmasawnna tura hmalakna hrang hrangte sawi hoin hun hman ho a ni, khawtlang tana pawimawh leh an ngaihmawh zawngte sawiho a ni.