Zirtawpnia sawrkar mi pawimawh thukhawmte chuan Mizoram a covid 19 hripui leng chuan a vawrtawp thleng mek mahse  lockdown kalpui rei a nih tawh a mipui lamin an tawrh rei tawh avangin total lockdown chu dinhmun enin kalpui zel a tul tih chiang mahse pawhsei chhunzawm chu thil harsaah an ngai a. Total Lockdown hlih nghal tawp erawh thiltih chi a nih loh a vangin fimkhurna uar zawka kalpui chunga sumdawnnate kalpui a, hnathawk thei sia inkaihhruaina khauh tak siam rawt a ni. He meeting  hi Deputy Chief Minister in a kaihruaia Political Party hrang hrang aiawhte pawh an tel a ni.

Inrinni zanlaia total lockdown tawp mai tawh tur Zirtawpnia a phelh dan tura inrawnkhawmna sawrkarin a ko chauh hi duhai chuan a tlai deuhin a langa, thil tam tak tih tur  awmin a rinawm a ni.  Lockdown kaihhnawih mipui hriattur puan phut a ni thin hian mipui a tibuai fo a, ni hnih thum tal tla hman sela mipui lam inpuahchahna hun pek hi a pawimawh a ni.  

Lockdown neih tirh atangin ni 110 lai a lo liam tawh a, hri kai tam vanglai erawh a ni si a ni. Kalpui a nih dan enin inkhuahkhirh hming pu siin SoP lamah kan inthlahdul fo tih a lang a, thawk khat lai phei kha chuan khawlaiah lirthei tawt khawpin kan awm leh hman tho a nih kha.  

Hrikai kan pun zel avangin NGO te nawrna in July ni 18 atangin khauh tak maiin total lockdown puan a ni ta nge nge a, kar 3 hman a nih hnuah pawh zia lam kan pan hleithei lo a. Lockdown rei tawh vanga a duh lotute nawrna a lo awm a leh a, sumdawng pawl te chuan sawrkar lam hmuin economy tlema zawng a chet theih na turin an nawr ve bawk a. Heng hi thu dik vek a ni nangin tuna a lan danah chuan sawrkar hian dinna mumal a nei loa, a nawrna lam lamah a thle ni hian a hmuh theih a, a pawi hle a ni. April ni 20 inkhuahkhirh puan a nih tan atan khan SoP  khauh tak nen bul tan nise tun dinhmun chhe tak hi pumpelh theih a nih a rinawm. Chuvangin sawrkar hi a thutluknaah ding nghet tawh sela, mipui that tlanna tur a tuang a tih chhah a ngai a ni. 

Kan ram hruaitute thukhawmin an rel ang hian lockdown bur hi zawi zawiin sawrkarin a thlah dul hret  chu chu a ni dawn ta a,  eng pawh nise eng tin nge sawrkar hian mumal leh awmze nei takin helai hi a kalpui thei dawn em tih chu zawhna chhan mai theih a ni lo a, hunin a hril dawn a ni. Hun kal tawha a tihfuh loh  atangin sawrkar hi a inzir  tawh tura beisei bawk ila.                Eizawnna lamah pawh pawl chak deuh nawrna la vawng ngawt loa, eng eizawnnain nge tuar naa sum lakluh vat mamawh hmasa tihte bakah thil hrang hrang thlir chungin SoP pawh a siam ni turah beisei ila. Health lam mithiam te ngaih-dan leh economy lam a buk thiam a ngai a, chutah chuan mipuiin an tawrh loh theihna ang bera kalpui zel a ngai dawn a ni.  A ni lo a nih chuan hla ngai bawk kan sa nawn leh palh thei a ni.

Kan mithiamte sawi dan hian vanduai chu awm tak meuh mahse tam tak hi chu inthlahdah zeuh vanga hri kai an ni a. Mipui lam pawhin lockdown thlahdul hret hi dawn sawn thiam a ngai a, rik luih luih lam leh khuahkhirhna pumpelh dan zawn nan hmang lo sela. Hri laka inven dan mitinin kan hre tawh a chumi zawm chu himna a nih bakah buai ti reilotu a ni dawn a ni.

Lockdown tlema thlahdul turah hian SoP  lam hi a thuziakah khauh viau mahse a kenkhawh leh a zawm lam hi a pawimawh a, thu a takah chantir a ngai a ni ber e.