Aizawl November 30, 2022 : Vawiin khan South Tuipui Congress Block pathum Special Meeting neih a ni a. MPCC President Lalsawta leh MPCC Vice President Lal Thanzara ten an hman pui a, MPCC President Lalsawta chuan 2023 MLA General Election-a South Tuipui bial Congress Party Candidate atan Er. C. Laldintluanga, Hnahthial Model veng a puang.

MPCC President Lalsawta chuan, dik lo taka pawisa ngah hi phurrit mai a ni a. Sawrkar siam leh tlin tuma hmâna tih dan ṭha lo chhawm hi kan hnualsuat a ngai, tih sawiin, hmâna tih dan aia ṭha zawk, midang te leh ram tana thil tha zawk siam hi kan tih tum a ni a. Congress party chuan ram chhe zel tur dinhmuna a din kan rem ti lo. Kan tu leh fate tana ram tha leh nuam zawk din hi kan tum ni, a ti. 

Lalsawta chuan, "Duhthlanna fim tak Pathianin a pek ram mipuiin a hman hi Congress party duh dan a ni a. Sum leh pai hmanga mipui lei theiha ngaihna hi Congress chuan kan dodal zel dawn.Hunin thil ṭha ti turin min nawr, ramin min hmuak bawk. Sum leh pai hmanga inthlem dodal hi Kohhran, MPF, Election Commission te duh dan a ni," a ti.

Sawta chuan, "Kum 2023 inthlanah Congress party hi kan mal tan dawn lo, dik leh fel taka kan tih chuan Pathianin min pui dawn tih hi kan ring ngam bawk. Congress kan sawrkar chuan hlemhlêt duh mahse an hlemhle dawn lo, ei ru turin chance an nei dawn lo. Thusawi hlimawm leh nuihzatthlak ka sawi thiam lo, ka sawi theih erawh Mizoram damdawi a ni. Sawrkar tha siam kan duh avang leh thluaka sum lut laka fihlim kan duh avangin Candidate kan puang zawih zawih lova, kan fimkhur a ni. Chutiang turin South Tuipui bial hmasawnna hnathawk tur leh dikna luipui luantir turin Pu Er. C. Laldintluanga, Hnahthial Model veng hi kan puang a ni," a ti. 

South Tuipui bial MLA Candidate atana puan tak Er. C. Laldintluanga pawhin thu sawiin, Congress, MNF leh PC Ministry ka hrawn vek tawh a, Remruatna fel, sawrkar inrelbawlna fel tak nei thin chu Congress sawrkar a ni, tih sawiin ruling lai ni lo, oppostition an nih laia Congress party ka zawm thei hi ka lawm zual, a ti bawk. 
Pu Dintluanga chuan, ram tana zau zawka rawng bawl theihna hun ka neih bul tanna ni ah hian bial mipuite thurawn engpawh dawngsawng tura a inpeih thu sawiin, tuna Congress party hmalak mek dan leh Congress Party President Lalsawta rintlakna leh dikna hi zui tlak, zui tur dik niin ka hria. Inrelbawlna tha lovin a nghawng rapthlak zia ka hria," a ti

Er. C. Laldintluanga chuan Congress President Lalsawta chu a lehkhabu 'That loh Theih Lohna Bawm' avang ringawt pawha Mizoram mamawh a ni, tiin, "Ram leh hnam tana hna tha pawh thawk thei lova, an mahni thlangtute mitmei pawh veng eih lova hotute tlawna hun khawhral turin Congress party hi ka zawm ve lo. Mipui damna, himna, hmasawnna leh thlamuanna pek hi ka tum a ni," a ti bawk.

MPCC Vice President Lal Thanzara pawhin thu sawiin, Congress Party-a haw runpui a thleng mêk tih sawiin, mi ṭha tak takin Congress an zawm mek zel a. Ram leh hnam hmasawnna hnathawk tura mi ṭha kan sawm te pawhin kan Chief Ministerial Candidate Lalsawta an enin zui tlak leh zui atana an duh a nih avangin an hnar ka ring lo, an lo tel ve thuai kan beisei, a ti.

Lal Thanzara chuan, Chief Minister a lo lan apianga nuih tumna hri leng tih reh hi a tul tih sawiin, Kamrula te hovin Cabinet Minister nih theihna chance an neih sân em emna party hi Mizoram mipui tan pawm reng chi a ni lo, a ti bawk.