Aizawl: Sports Minister Robert Romawia chuan nimin khan Outdoor Gyms siamlaite leh Chanmari Mini Sports Complex a tlawh.

Nimin zing khan Sports Ministe Robert Romawia Royte chuan Mualpui R.Dengthuama Hall kawtzawla Outdoor Gym siam mek chu a hmunah a tlawh a. Sports Minister chuan, "Mizoramin ala hmuh ngai loh Outdoor Gym hmun 2 a kan nei thar tur hi a lawmawm a, tunlaiin Outdoor Gyms hi khawvel hmun hrang hrangah leh India khawpui lianah te an uar hle a. Man chawi ngai lova a duh apiangin excercise an lak theihnana siam a ni," a ti. Outdoor Gym set 1 hi kum 5 Warranty nen cheng nuai 60 zel a ni a, Arihant Industrial Corporation siam niin an Authorised Dealer Mapuia Enterprise, Aizawl in supply-in an remkhawm a,kum 5 chhung a thlawnin a enkawl zui dawn a ni.

Minister hian Mualpuiah vek Sports Hostel building 2 saklai mek te chu a tlawh a, Khelo India Centre of Exelkence atana hman tel tur anih avangin chak zawka hnathawh a tul thu MSSC Engineers te a hrilh a ni.

Mualpui a tlawh zawh hian Minister hian Upper Republic a MSR Gym pawh tlawhin sawrkar puihna tel lova mimalin sports facilities tha tak tak an din ta chu lawmawm a tih thu sawiin, "Sports hi industry hlawhtling tak, mi tam takin eizawnna leh sumdawnnana an hman chhoh zel tur a ni," a ti.

Hemi hnu hian Mineco Complex a Outdoor Gym siam mek pawh Sports Minister chuan a hmunah a endik bawk a, a awmna hmun chu mi tam takin exercise an lakna thin anih avangin a tangkai hle a rinthu a sawi a, "Taksa sawizawi pawimawhna Mizo mipuiin kan hriat thar zel avangin Fitness atana pawimawh chi hrang hrang sorkarin a ngaihtuah zel dawn a ni," a ti.

Sport Minister hian Zirtawp zing khan Chanmari Mini Sports Complex a tlawh bawk a, sakthat dan turte a en a ni.