Tottenham Hotspurs chuan vawi khat nan Premier League-ah chawlhlawk hmain goal nga an chhuah a, minute 45 chhung pawh a ni lo, minute 21 lek chhungin a ni an chhuah ni!

Pathianni zanah season thara Champions League-a inlan tum pahnih inhmachhawnah Newcastle United-in 6-1 ngawt maiin Spurss an sawp a, minute kua lek chhungin Magpies hian Spurs goal-ah goal thum an thun hman.

St. James Park-a inkhelah hian second 63 lekah Jacob Murphy chuan Spurs lamah a thun nghal a, Joelinton chuan minute 6-ah chhunzawmin Murphy bawkin minute 9-ah a thun belh.

Alexander Isak-an minute 19 leh 21-ah thun leh bawkin si nga faiin Newcastle-in hma an hruai der a, chawlhlawk hnu lawkah Harry Kane-a’n Spurs tan si khat sut ve bawk mah se Callum Wilson-a’n Magpies tan a thun belh leh ta zawk.

Premier League chanchinah Newcastle aia goal nga thun rang hi Manchester City chiah an la awm a, Citizens hian September, 2019-a 8-0 ngawta Watford an sawp tum khan minute 18 lek chhungin goal nga an lo thun tawh a ni.

Eddie Howe-a kaihhruai Newcastle hian Premier League season khata goal 10 leh a aia tam thun thei player pathum an neih vawi khatna an tawng bawk a, Isak, Wilson leh Miguel Almiron ten goal 10 an thun tling ta theuh a ni.

Pathianni zana inkhel team hnih hi season thara Champions League-a inlan tuma bei ve ve an ni a, Magpies hi Manchester United aia khelh khata khel tam chungin goal difference that zawk vangin an lehpel a, pathumnaa an kai theih laiin Spurs erawh panganaah an la awm zui ta.

Spurs tan hian Champions League hi mitthla phak a la ni zel dawn em a hriat ta lo hle a, palinaa awm mek United chu point ruk laiin an phak lo tawh a, United-in khelh riat hmabak an la neih laiin anni chuan khelh ruk chauh an ni tawh bawk si.

Hetih lai hian an hnuai daiha awm, Liverpool pawhin Inrinni zana Nottingham Forest an hneh hnuah a sang pali an rawn mitthla thar veleh ngam a nih chuan tuna panganaa awm tan beidawnna tur a la awm lo a tih theih ve tho bawk ang chu!