Sri Lankan mipui thinrim sang rualte chuan an khawpuiah an president, Gotabaya Rajapaksa chenna an luhchilh.

An ram chhung hrang hrang atanga mipui kalkhawmte hian Colombo-ah kawng zawhin an ram sum leh pai a enkawl thiam loh avanga buaina namen lo an tawh mek avangin Rajapaksa chu bâng turin an nawr.

President hi hmun himah kalpui hman nia sawi a ni.

Sri Lanka-ah hian nasa takin thil man a sang a; ei tur, tuialhthei leh damdawi an lak luh theih loh avangin an talbuai mek.

Sorkar laka lungawi lote hian an khawpui hi car, van leh bus-in an pan khawm niin thuneitute chuan AFP news agency an hrilh a, \henkhat phei chuan rel thununin an pan bawk niin an sawi.

Colombo-a government district-ah an lut a, ‘Gota, haw rawh!’ tiin an au rual a, police-in an lo danna eng emaw zat paltlang luiin President Rajapaksa-a inah an lut.

President ina an lut tur dan nan hian police chuan van lam hawiin silai pawh an hmet puak hial a; mahse, hei pawh hian a dang zo chuang lo.

Facebook-a thil thleng lai tihchhuahah chuan in chhungah hian mipui za tel an inhnawh lut a, pindan leh inkalpawhnaah an khat hung a, pawn lamah anmahni aia tam mah an awm khawm bawk niin Reuters news agency chuan a tar lang.

Thuneitute chuan hetianga mipui thinrim che chhuak tur dan nan hian Zirtawpni zan khan curfew an puang lawk a; mahse, mipui hian engah mah an ngai lo va, mipui pawl leh eptu party tam takin an dodal bawk avangin curfew hi hlih zui a ni ta nghe nghe.

Prime Minister Ranil Wickremesinghe chuan an rama political party hrang hrangte nen emergency meeting a ko nghal a, speaker hnenah parliament inkhawm ko turin a ngen bawk.

Kar hmasa khan thuneitute chuan an indaih lo lutuk tur ven nan ni tin mamawh phur ni lo lirtheite hnena petrol leh diesel hralh an khap.

Sorkar hian tuialhthei hi a bain Russia pawh telin, ram dang atanga chawk luh dan an dap mek a, an la hlawhtling thei rih lo.

Suma puih an mamawh thuai thuai thu leh Covid-19 hripui leng an tawrh nat thu an sawi a. Hri leng avang khan an sum hnar ber pakhat, khualzinte atangin engmah an la lut thei lo niin an insawi.

Mi thiamte erawh chuan sorkarin sum leh pai a enkawl thiam loh vanga hetiang tawng hi niin an sawi ve thung.

Mipuite hian March thla atang tawh khan President Rajapaksa hi bâng turin an lo nawr tawh a. An nawrna na zelah president u, Mahinda Rajapaksa chu May khan a lo bâng tawh.

SRI LANKA bulthum

Sri Lanka hi India chhim lam chiaha awm, thliarkar ram a ni a. Kum 1948 khan British rorelna lak atangin zalenna an sual chhuak a. Hnam/pawl lian tak tak pathum - Sinhalese, Tamil leh Muslim awmin hengte hi an rama cheng mi maktaduai 22 zinga 99% zet an ni.

Kum tam tak chhungkaw khatin an ram rorelna fawng an chelh tawh a. Mahindra Rajapaksa hi an rama tam ber, Sinhalese-in an ngaihsan niin kum 2009 khan inlak hran tuma bei nasa tak, Tamil hel a hneh vang a ni a. Hetih lai hian a unaupa, Gotabaya hi defence secretary a ni.

An ram eibar dinhmun hniama chhe mek hian an ram a tibuai nasa hle a. Ram dang atangin thil an lak luh theih loh avangin ei tur, damdawi leh tuialhthei man a sang em em a, mi narante chu khawlaiah chhuakin Rajapaksa chhungkua chu bâng turin an nawr nasa ta hle a ni.