Ranil Wickremesinghe chu vawiin khan Sri Lanka president pakuana atan lak luh a ni a, an ram economy chawi kan chu a hna hmasa ber tur a nih thu a sawi. Lak luh inkhawm hi Parliament-ah neih a ni a, Chief Justice Jayantha Jayasuriya chuan rinawmna thu tiam tirin a lalut a ni. 

Prime minister hlui kum 73 mi Ranil Wickremesinghe hi mipuiten an ram president atan an duh lo hle thung a, mahse, hun eng emaw chen an enthla dawn nia tarlan a ni. Sri Lanka president kal chhuak ta Gotabaya Rajapaksa kha an ram sum leh pai tlak chhiat chhanah ngaiin mipui nasa takin an dodal a, buaina nasa tak a chhuak zui bawk. 

Mipui lungawi lo an chet nat avangin Gotabaya Rajapaksa pawh hian taksa himna zawngin an ram a chhuahsan hial a ni. Amah thlaktu Ranil Wickremesinghe pawh hi mipuiin an duh chuang lo a, lakluh  anih lai pawh hian parliament kawtah mi eng emaw zat an pung khawm. Hei vang hian venhimna pawh khauh taka kalpui a ni. 

Wickremesinghe hian president dinhmun luah tur hian parliament-ah fiahna a paltlang a, Sri Lanka's People's Front (SLPP) MP te vote hmangin hnehna a chang a ni. A elpui lian ber Dullus Alahapperuma chuan hnehna a chang zo ta lo thung a, vote 134 leh vote 82 an hmu a ni.

Activist Jeana De Zoysa chuan, "Result hian min tilawm lo hle a ni. MP 134 te hian mipui duhdanin vote an thlak lo a ni," tiin a lungawi loh thu a auchhuahpui. 

Sri Lanka hi economy-ah nasa takin a tlahniam mek a, an ram sum leh pai tlakchhiat chhanah hian president hlui Gotabaya Rajapaksa leh prime minister hlui Ranil Wickremesinghe te hi mawhphurtu berah ngaih an ni. Hetiang a nih lai mek a, president atana Ranil Wickremesinghe lakluh leh si hi mipui chuan an hrethiam thei lo. Mipui lungawi lo hian hian president Gotabaya chenna-in an luhchilh tawh a, prime minister office an luhkhung bawk - bungrua thahnem tak an tichhiah a nih kha.