Aizawl: Nimin zing khan Central YMA hnuaia ruihhlo do tura din, Supply Reduction Service (SRS) 9th batch ruihhlo man chu Central YMA office-ah Chief Minister-in a hal ral a. Chief Minister chuan ruihhlo do puan a ngai tak zet tih a sawi.

SRS ruihhlo man halralna puala inkhawm hi Central YMA General Secretary Lalhma-chhuana chuan a kaihruai a, thu sawiin Chief Minister Zoramthanga chuan, “Ruihhlo hi kohhran, sawrkar leh khawtlangin kan hua a, theihtawpa kan do tlan a ngai tak zet a ni,” a ti.

Chief Minister chuan ruihhlo do turin a lo kalna tihtawp, a dotu tihchak leh a mamawhtu (demand) tihtlemte chu thil pawimawh a ni tih sawiin, “Ruihhlo tam ber lo kalna, khawchhak lam hi lo lut tlem tura tan lak a, Myanmar lama kan unaute pawhin an huat theih nan tanlak a ngai a. Kan ram chhungah pawh a dotute kan tihchak a ngai a. Demand a tlem theih nan ruihhlo ngaite enkawlna tur hmun, nuam ti taka an awm theihna tur kan siam a ngai a ni,” a ti.

Chief Minister hian Sethawnah ruihhlo ngaite enkawlna tur hmun chu chei a, an hmalak dan turte enpui turin tun kar Nilaini hian kal a tum tih a sawi a. Ruihhlo dona atan sum leh paiah theihtawp chhuah an tum thu te, sawrkarin tih tak zeta ruihhlo do a tum thute a sawi bawk.

Halralna inkhawma thu sawitu dang, Home Minister Lalchamliana chuan, “Ruihhlo hian min rûn nasa a; chuvangin, a do kawngah tha thlah thei kan ni lo a, a do kawngah tlawmngai pawlte nen thawhho zel kan duh a ni,” a ti a. Sawrkar hmasain Ruihhlo Do Core Committee a din chu tihnun zel tum a ni tih a sawi.

Excise & Narcotics Minister Dr. K.Beichhua pawhin ruihhloin thalaite a tihchhiat nasat avangin a thinrimthlak thu a sawi a. “Ruihhlo do kawnga kan tanhona hi kan ramin a dampui dawn a, inlungrual taka kan tanho sauh sauh a pawimawh a ni,” a ti.

Central YMA President Vanlalruata pawhin thu sawiin, “Ruihhlo hi tangruala kan do loh chuan kan hmabak a ropui lo hle dawn a, ruihhlo vanga kan thalai 1500 chuang an thih tawh avangin tan kan lak a ngai tak zet a ni,” a ti a. Central YMA chu ruihhlo do tur a ni lo chungin Mizo thalaite chhan an ngaih avangin a penchhuak mai niin a sawi bawk.

Nimina halral tak ruihhlote hi April 3, 2019 atanga July 20, 2019 inkar chhunga SRS-ten an man a ni a, an thil man hlut zawng hi Rs. 82,17,625.00 nia chhut a ni. SRS 9th batch hian an hun chhung hian ruihhlo kaihhnawihah mihring man 852 an nei a, heng zinga 47 chu home-ah dah an ni a, 66 chu Excise kutah an pe a, Police hnenah 19 pein mi 600 chuang counselling an neihpui a ni. Central YMA hian kum 2004 December 4 atang khan ruihhlo do hna hi a kalpui tan a, nimin atang khan SRS 10th batch ten an hna an tan ve leh nghal a ni.