Aizawl: Ni hnih chhung awh 30th State Level Children's Science Congress kharna chu Zirtawpni khan School Education Directorate Conference Hall-ah neih a ni a. School Education Minister Lalchhandama Ralte chu khuallian a ni.

Minister Chhantea chuan Mizoram sawrkarin Science zirna tih hmasawn nan tan a la mek tih sawiin, "Bilingual textbook tihchhuah a ni dawn a, Science leh Mathematics zirlaibu te chu tawng pahnih English leh Mizo tawngin bu khatah siam mek a, November thla tawpah tih chhuah hman beisei a ni," a ti. Minister chuan tun hnaia JEE lo chhuakah Mizo 5 te chu IIT a lut thei turin an inziak tling tih sawiin, "Mizo naupang 5 zinga pakhat phei chuan 99.17% a score phak a, midangin an tih theih chu Mizoten mahni bu zawl atangin a tih ve theih tih a tilang chiang a, a lawmawm hle a ni," a ti bawk.

Khualzahawm Er H.Lalsawmliana Chief Scientific Officer pawhin thu sawiin Child Scientist te chu an vanneihzia leh hma lam hun eng tak nei an ni tih a sawi a, phur tak leh taima taka in zir sauh sauh turin a fuih bawk a ni.

State Level Children's Science Congress-ah hian National Children's Science Congress a tel tur Child Scientist 8 thlan an ni a, Indian Science Congress-a tel tur Child Scientist 2 thlan an ni bawk. National Children's Science Congress hi Ahmedabad Science City, Gujarat-ah January 27-31, 2023 chhungin neih a ni dawn a ni.