May 18, 2022; Mizoram a Dawnfawh (Watermelon) thar hnem ber, Saitual district chhung a awm, Lamzawl khua chuan an Dawhfawh tharchhuah tihralna an hriat mumal loh avangin an dah chhia/tawih mek a. Tihralna lama harsatna an tawh nachhan bul ber chu Myanmar leh state pawn/rampawn atanga Dawnfawh chawkluh tam lutuk vang a ni.

Watermelon society, Lamzawl hruaitute hnen atanga ZALEN thudawn danin, an khua a kumin a Dawhfawh ching a hmala chu chhungkaw 30 bawr vel an ni a, an inchhut danah, kg 1 Rs 40 hisapin, cheng nuai 200 bawr vel man thar thei turah an inngai a. Hetihlai hian tun dinhmunah erawh hralhna tur an hriat loh avangin an Dawhfawh thar te an dah chhia/tawih mek a, tun thlengin pum 7000 chuang chu chhe tawh ah anngai a, mimal anga pum 2000 chuang tichhe tawhte pawh an awm.

Dawnfawh te hi tunlai a thar vanglai a ni a, June 10 ah chuan lo zo vek tawh turah an inngai a, hralhna tur an hriat loh avangin tun dinhmunah chuan kg 1 Rs. 20 a tihral mai te pawh an pawiti tawh lo niin watermelon society, Lamzawl hruaitute chuan ZALEN an hrilh.

"Mizoram pawn atanga chawkluh hi awm lo sela chuan kan buai lo vang. Chung ai chuan kan rate a to chuang lo a, an pekna anga pek dawn pawhin kharchhawng ten an la duh chuang lo. Anni chuan awm hmun ah an pe thei a, a tlawm tho bawk si a, hengte vang hian a hralhna kan hre lo a, kan dah tawih tlawk tlawk mek a ni," an ti.

Nikum lam kha chuan Horticulture department in a tihralna lam an buaipui a, a hmun ah Rs. 50 in an hralh char char thei a, commission hovin Rs. 40 in an la bawk a, cheng nuai 60 chuang man an tiral thei a, kuminah erawh harsatna nasa tak an tawk mek a ni.

"A lawh vanglai tak a ni a, a hmunah kan dah vum hneng hnung a, a tawih tawk a awm reng bawk a, tunhnai khan a tihralna lama hma min laksak turin sawrkar ah ngenna kan thlen tawh...," Watermelon society, Lamzawl hruaitute chuan an ti bawk.

Saitual district chhung Lamzawl, Ngopa leh Pawlrang khuate chu tun dinhmuna Dawnfawh tharchhuak thahnem deuh te nia hriat an ni a. Lamzawl ang bawkin, Ngopa leh Pawlrang lam pawh hian an Dawnfawh thar hralhna kawngah harsatna an tawk mek nia thudawn a ni.