Aizawl June 1, 2023 : All Mizoram CSS Employees Co-ordination Committee chu vawiin khan an hnuaia Department hrang hrang a CSS Association office bearers te nen Joint Meeting an nei s, sawrkarin CSS Employees te hamthatna tura 'Study Group on CSS' a din ten 'Recommendation' a lo siam tawh chu tihhlawhtlin ngei an phut.

CSS Employees Co-ordination Committee chuan resolution siamin, CSS Employee te hamthatna tura August 16, 2021-a Study Group a din tawh, Study Group in 'Recommendation' a lo siam tawh chu tun thlengin tih hlawhtlin a la ni lo an ti a, June 15, 2023 hma ngeia sawrkarin he 'Recommendation' hi a tihhlawhtlinsak lo a nih chuan an kal zel dan tur All Mizoram CSS Employees Coordination Committee ten an ngaihtuah tur thu sawi. 

CSS Employee te chuan, "Mizoram Sawrkar hnuaiah kum tamtak chhung thawk tawh leh Mizoram hmun kilkhawr ber thlenga hmasawnna hna thawktu kan ni a. Tun dinhmunah hian member 12000 vel awmin, kan telloin sawrkar department hi a kal thei tawh meuh lo a ni. Hetih mek lai hian kan service ah erawh hamthatna engmah dawng ngai lo kan nih avangin sawrkar hian a rang thei ang berin 'Regularization Scheme' leh Study Group in a recommend, hamthatna dang min siamsak ngei rawh se," an ti.