Sumdawngte harsatna ngaihven rawh se -CLP ; Kan mangang tak zet tawh a ni -NMSJA

Admin - Sep 12, 2021

Congress MLA ten Aizawl New market an tlawh

Aizawl: Congress MLA te chuan nimin khan Aizawl new market thiah tak tlawhin thil awmdan an enfiah a. New market a sumdawng te harsatna tawh mek chu Mizoram sawrkarin ngaihven thuai se an duh tih an sawi a. New Market Sumdawng Joint Association hruaitute chuan an eizawnna hmun new market sak mai a nih loh avangin an mangang tawh tak zet tih an sawi. 

Nimina Congress MLA, New market tlawhtute hi Palak bialtu MLA KT Rokhaw lerh Hachhek bialtu MLA Lalrindika Ralte te niin Congress Media Cell hruaitu ten an tawiawm bawk a. Congress Legislature Party te chuan Congress sawrkar lai atang tawhin Bazarpui a tahtawla sak ṭhatna tur chu ruahmanin a chhunga eizawngtute, seat nghet nei chhungkua 1093 bakah nitina helaia eizawnga in zuar ve dang mi 800 chuangte an buai lutuk loh nan an insawnchhuahna tur building te ngaihtuahin ruahmanna fel tak nen a tahtawla sawn an ni tih an sawi a. "MNF sawrkar hnuah ruahmanna leh remruatna fel engmah nei si lovin building ṭhiah sak an ni a, ruahmanna fel siam hmasa lo a, bazara eizawngte eizawnna ti chhe zawnga MNF sawrkarin hma a la hi a pawi kan ti hle a ni," an ti a.  "Covid-19 hripui leng karah heng dawr thiahsak tak chhungkua te hian harsatna namen lo an tawk mek a. Sawrkar atangin chhawmdawlna an dawng lova, engtikah nge an eizawnna dawr hawnga bul an tan leh theih ang tih an hre hek lo. Chuvangin, sawrkar hian an harsatna hi a hmunah enpuiin, sawipui se, sum leh pai awm dan pawh hrilh chiang se kan duh a ni," an ti bawk.

New Market Sumdawng Joint Association hruaitute chuan new market building thiah zawhna pawh kum 1 dawn anih hnuah pawh hmalakna engmah a awm lo chu mak an tih thu sawiin, "Bazara thut hi kan chawbel ber a ni a, ni 1 kan thut loha buai mi tam tak kan awm laia an thiah zawhna pawh kum 1 dawn anih hnu pawha hmalakna a la awm lo hi mak kan ti a, kan mangang tak zet tawh a ni," an ti. New Market Sumdawng Joint Association hruaitute chuan chhungkaw tam tak chuan an bungrua te chu loan hmanga an lak leh midang hnen atanga an lakchhawn te a ni tih sawiin loan rulhna tur an neih loh bakah an thawmhnaw te chu a remchang ang angin an dah mai niin an sawi a. Sawrkarin an awmna tur nia a sawi chu a tet bakah rukru leh misual laka a himloh avangin an awm ngam lo niin an sawi bawk a. "Kan duh ber chu building hi sa thuai thuai se, invawmlut thuai thuai ila tih hi a ni a. Mahse tun thlenga hmalakna a la awm lo hi hrehawm kan ti hle a ni," an ti bawk.

New Market Sumdawng Joint Association hruaitute sawi danin building thar hi Aizawl smart city mission project sum hmanga sak tur a ni a, sum pawh hi a awm sa vek tawh nia an hriat thu sawiin hetih lai hian a satu tur thlan an la nilo nia an hriat thu an sawi a. New market main building ah hian dawr 177 a awm niin an sawi bawk.

Share now