Aizawl, June 6, 2022 : Japan atanga lo kal, Japan International Cooperation Agency (JICA) Survey Team chuan Mizoram State Super-Specialty Cancer and Research Centre (MSSSCRC) sakna thawh thuai a nih theih nan survey uluk takin an ti tawh tih an sawi a; 2028 kum tawpah chuan MSSSCRC hi a mamawhtute tana hman theih a peihfel beisei.

JICA Survey Team aiawhin Hiroshi Ako, Team Lead JICA Survey Team chuan Survey an kalpui dan te, MSSSCRC sak an tum dan te, MSSSCRC sak zawh hmaa State sawrkar lam atanga a thawktu tur lo lak leh thil pawimawh dang lo chinfel ngai chungchang te leh he project kaihhnawih a hriattur pawimawh te a sawifiah a. MSSSCRC project chu a tha thei ang bera duan a nih thu te, an uluk thu te leh project siam chhungin state sawrkar leh mipui lam atanga thlawpna an la mamawh zel tur chungchang te a sawi. Central sawrkar dawr a tul hunah pawh a tul anga Governor puihna pawh an la mamawh tur thu a sawi bawk a ni.

Governor Hari Babu Kambhampati chuan Mizoram mipui ten Cancer Damdawi In thabik a neih theihna tur sum leh thluak sengtu JICA official te leh JICA Survey team chungah Mizoram mipui aiawhin lawm thu a sawi a.  Mizoram mipuiin he Cancer Damdawi In changtlung tak hi mamawhna a san tawh a vangin a hun taka sak zawh hmana, hman thuai kan nghak hlel hle a ni a ti bawk.

JICA Survey Team ten report an pek dan chuan Kum 2028 kum tawpah chuan MSSSCRC hi a mamawhtute tana hman theih a peihfel beisei a ni.