Supreme Court chuan kum 2002-a Gujarat-a buaina a chhuah tuma Bilkis Bano-i pawngsuala a chhungte mi pasarih thattu, tun hnaia lung in atanga chhuah takte khing letna pahnih zinga pakhatah chu a hnawl.

Bano-i hian amah tihrehawmtute chhuah an ni chu hnawl leh turin court sang berah ngenna a thehlut a. Court chu May, 2022-a Gujarat sorkarin thiam loh changte a chhuah chu sut leh turin a ngen.

Mi 11-te hi dam chhung lung in tang tura hrem an ni a, August 15 khan ‘an nungchang a that’ vangin chhuah an ni a, hei hi kum 1992-a Gujarat-a BJP sorkar laia policy a siam niin union home ministry pawhin a pawmpui.

Bano-i chuan chhuah an nihna a khinnaah hian Gujarat chuan hetiang tihtheihna chanvo a nei lo niin a sawi a, thubuai pawh Maharashtra-ah ngaihtuah a nih thu a sawi a. Bano-i’n Gujarat-a ngaihtuah a nih chuan dik taka thu tihtluk loh a hlauh thu a thlen avangin Supreme Court chuan kum 2004 khan Mumbai-ah sawn turin a ti a ni.

2002 Gujarat riots tia sawi hi Godhra-a rel kang atanga intan niin he rel kang hi Hindu kal firfiakte chuan Muslim-te tih nia puhin nasa taka beih an ni ta chiam a ni.

He thil thlen lai hian Bano-i hi kum 21 niin thla hnih mi nau a pai mek a, mi 11-te hian an in leh lo an hal chhiatsak vek bakah a fa kum hnih mi telin a chhungte dang pasarih an thahsak a, amah an pawngsual rawn bawk.

Pawikhawihtute hi dam chhung tang tura hrem an ni.