Aizawl: Swachh Bharat Summer Internship Programme hnuaiah bawlhhlawh tawih thei lo, khawlai titawptu leh leilung tichhe theite chu Lawngtlai-ah kg 1 Rs 20/- zelin lei a ni.

Nehru Yuva Kendra (NYK), Lawngtlai chuan Thingkah Branch Young Lai Association (YLA) nen tangkawpin bawlhhlawh hi lei khawm niin, a vaiin kg 540 lei a ni a, bawlhhlawh lei nan hian Rs 10,800/- an seng a. Heng bawlhhlawh tawih thei lo an lei khawmte hi a paihna tur hmunah paih nghal vek a ni.

Zirtawpnia programme bultumtu NYK District Youth Co-Ordinator Mercy Sellate chuan NYK-in hetianga hma an lak chhan hi naupang rilruah faina leh thianghlimna pawi-mawhzia tuh ngheh a nih theih an beisei vang a nih thu a sawi a. He hma lakna kalpui hian naupangte chu faina lamah kawng dik a kawhhmuh an beisei niin a sawi bawk.

NYK hian naupang leh thalaiten nun kawng dik an zawh a, khawtlang leh ram tana mi tangkai leh chhawr tlak an nih theih nan hma an la thin a ni.