Aizawl: Mizoram Presbyterian Kohhranin harsatna hrang hrang te pan tur leh an harsatna sutkianpui tura a din Family Guidance & Counselling Centre pantu zingah nupa kar buai an tam ber. FGCC hian a dintirh atangin pantu mi 29477 a nei tawh a ni.

Family Guidance & Counselling Centre hian an din tirh atanga December 2019 thleng khan pantu (client) 29,477 an nei tawh a. FG&CC hi Mission veng, Vaivakawn, Champhai, Serchhip, Kolasib, Bawngkawn, Lunglei leh Mamitah te centre an nei a. Chanmari centre chu ni 15.9.2016 khan tihtawp niin Bawngkawnah an sawn.

Zalen palai zawhna chhangin Family Guidance & Counselling Centre Director Rev. Lalsangbera chuan an centre pantu zingah nupa kar buai an tam ber tih sawiin centre pantu zinga 28% chu nupa kar buai an ni tih a sawi a. Heng bakah hian rilru hah (depression/anxiety) in dawtin nulat tlangval inngaihzawn thil leh eizawnna/hnathawhna tluang lo te chu an case neih langsar zual niin a sawi.

FG&CC pantute chuan an hlawkpui nia a hriat thu sawiin a tha zawnga nun hmang ta tam tak an awm a, an case a zira kal nawn ngai engemaw zat an awm tih loh chu tha takin an inthlah thin nia a hriat thu a sawi.

A bikin zu/drugs ngawlvei te chu vawi khat mai inkawm a tawk loh avangin vawi 15/20 hial te pawh an kal nia sawiin an Centre an pan avanga an nun a tha zawnga inher ta tam tak an awm nia a hriat thu a sawi bawk. Rev. Lalsangbera chuan, "Thalai zingah chuan inngaih-zawn buaina vanga pantu te, High School leh Higher Secondary School zirlai an zirtirtu ten an hruai leh sualna avanga khawtlangin an man, Counselling tura kan Centre an rawn panpui hi a langsar zual chu an ni," a ti bawk.