ZALEN July 12, 2026: Mizoram Synod chuan Mizoram chhunga home/centre hrang hrang 38 tanpuina atan cheng nuai 80 pek an tum.

Kum 2024 Synod inkhawmpuiah, ‘Ruihhlo ngaite enkawIna home hrang hrangte hi Synod hian tun aia nasain tanpui ni rawh se’ tih thu Tuirini Presbytery atanga thu lut chu rawtna ang hian SEC-in lo bawhzui zel rawh se tiin rel a ni a. SEC chuan, “Home hrang hrang nasa zawka tanpui dan tur lo zir chiangin Social Front-in rawtna nen SEC-ah thlen leh mi se kan ti,” tiin a rel a. Social Front Committee-in Social Front Executive Committee bawhzui turin a dah a, Social Front Executive Committee chuan lo zir chiang a, ruahmanna te siam turin mi pathum a ruat a. An ruahmanna chu Synod Social Front Executive Committee-in a thlir leh hnuah SEC-ah thlen leh a ni ta a ni.

Synod zirchianna atanga a lan danin tun dinhmunah Mizoram chhungah rehabilitation/de-addiction home 44 an awm mek a, an zinga 12 hian Ministry of Social Justice & Empowerment atangin tanpuina an dawng a. Home zinga pariat hi kohhran enkawl lai a niin eizawnna atana din 2, pawlho enkawl 17 leh chin hriat loh panga an awm mek.

Synod chuan Mizoram chhunga mimal leh pawlho din de-addiction centre/rehabilitation centre ding tawh phawt chu sumdawnna lam hawi a nih loh chuan tanpuina hi pek vek nise a ti a. Tanpuina hi tum hnih semah hman nise, an dinhmunte zir chiangin pek nawn tlak lote pawh a awm theih avangin tanpuina hi tum khatah pek vek ni lo se a ti a ni.

Synod in ruahmanna a siam dan chuan TNT enkawl Kalvari hospital, Zuangtui hnenah nuai 10, Blessing Home Sakawrtuichhun hnenah nuai 1, TNT Kolasib-ah nuai 5, TNT Lunglei nuai 7, TNT Champhai hnenah nuai 5, Tawngtai Bethel Camping Centre, Sakawrtuichhun nuai 7, OKM Phunchawng leh Golgotha camping centre Vairengte hnenah nuai 5 ve ve te chu an pek tam zual langsar an ni a. Heng bakah hian home hrang hrang te chu mihring an enkawl tam dan a zirin Rs. 50,000, Rs. 1,00,000, Rs. 2,00,000 leh a dangte an ruahman bawk.  

Synod chuan Ministry of Social Justice and Empowerment atanga tanpuina dawng mek Centre 14 te tanpui nana senso tur atan Rs. 28, 00, 000.00, mi 50 aia tlem awm mekna Centre 17 tanpui nana senso atan Rs. 17, 00, 000.00, mi 51 chunglam, mi 100 aia tlem si awm mekna centre 4 tanpui nana senso atan Rs. 8, 00, 000.00, mi 301 chunglam, mi 500 aia tlem si awm mekna centre 2 tanpui nana senso atan Rs. 10, 00, 000.00, mi 501 chunglam, mi 1000 aia tlem si awm mekna centre 1 tanpui nana senso atan Rs. 7, 00, 000.00 leh mi 1001 chunglam tanpui nana senso atan Rs. 10, 00, 000.00 a pawm a. Tanpuina sum senso tur zawng zawng belhkhawm hi a vaiin Rs. 80, 00, 000.00/- a ni.

Thialak - TNT hmun Kolasib