Taliban-ten Afghan ramri khaw pawimawh pahnih la

Admin - Jul 11, 2021

Iran bula Islam Qala leh Turkmenistan ramria Torghundi khua an la

Taliban-te chuan hma sawn zelin Afghanistan hmar lama Iran leh Turkmenistan nena an inkalpawhna khân pui ber chu an la leh ta tih sorkar thuneituten an sawi.

Helho hian ramri khaw pawimawi pahnih, Iran bula Islam Qala leh Turkmenistan ramria Torghundi khua an la.

Video thehdarhah chuan Taliban-te hian border customs office chunga Afghan hnam puanzar la thlaa anmahni puanzar an zar lai a lang.

United States kaihhruai sipaiten Afghanistan hi an chhuahsan mek zel laiin Taliban hian ram an zau thar ve mek zel.

Taliban thuneitute chuan Afghanistan ram 85% vel an kutah a awm tawh niin an sawi a, a ni ngei em tih erawh sorkar atang leh hmun dang atanga fiah theih a ni rih lo.

Chhut dan dangah chuan Taliban0te hian Afghanistan hmun lia thena hmun thum vel, district 400 vel an thunun tawh ang a ni a, an thunun zingah hian khawthlang lama Iranian ramri atanga chhak lama China nena inrina thleng a ni.

American-te hian kar kalta tir lam khan engmah sawi lawk pawh awm lovin Bagram airfield an chhuahsan a. He hmun hi US-in Afghanistan-a beihpui a thlak chhunga an hmunpui ber niin sipai pawh sing tel an awmna thin a ni.

Afghan thuneitute pawhin Herat province-a Islam Qala leh Torghundi border crossing an chân tih an hre tawh.

Islam Qala khua hi Iran nena an insumdawn tawnna kawngpui pawimawh ber a ni a, he khua kaltlanga sumdawnna atang hian thla tin sorkar hian $ maktaduai 20 vel la lut anga chhut a ni a. Torghundi pawh hi Turkmenistan nena insumdawn tawnna kawngpui pahnih an neiha pakhat zawk a ni.

Sorkar thupuangtu chuan Afghan sipaiten khaw hnih hi lak let ngei tumin an bei mek tih a sawi.

“Border unit pawh telin Afghan venhim hna thawktute chu a hmunah hian an sawm a, lak let tuma beihna a kal mek,” tiin interior ministry thupuangtu, Tareq Arian chuan AFP news agency hnenah a sawi.

Taliban thupuangtu, Zabihullah Mujahid Islam Qala khua chu ‘kan thuhnuaiah a awm fel vek tawh’ a ti.

Taliban-te hian Herat-a district panga chu silai hmet puak miah lovin an thunun tawh nia sawi a awm bawk.

Aghan buaina leh Taliban

Kar liam ta tir lam khan Afghan venhim hna thawktu 1,000 chuang chuan an ram hmarchhak lama Tajikistan-ah Taliban ram zauh zel hlauvin an tlan lut.

Russia chuan Zirtawpni khan Taliban-te hian Afghan-Tajik ramri chu zawi zawia thununin tunah chuan hmun thuma thena hmun hnih chu an la tawh niin a puang a. Russian foreign ministry thupaungtu, Maria Zakharova chuan Afghanistan-a a khawi zawk zawk pawh inbengdai turin Moscow chuan a duh tih a sawi.

Taliban-ten Afghanistan-a ram an zauh leh mek lai hian US President Joe Biden chuan kum 20 zet an awm chilh tawh ram chhuahsan chu a hun niin a sawi ve mek bawk a. “Tum tihhlawhtlin tur dang tha tawk a awm loh chuan Afghanistan-ah hian indo turin American-te thawn lut ka tum tawh lo,” tiin Biden-a hian a sawi a. Afghan sorkar chuan an ram pum thunun turin theihna an neih tawk loh thu a sawi bawk.

June thlaa US intelligent-ten an zir chiannaah chuan Taliban hian thla ruk chhung lekin Afghanistan hi an thunun leh hman mai an ring.

Afghan President Ashraf Ghani erawh chuan an venhim hna thawktute chu Taliban lian zel tur dangchat turin an tha tawk niin a sawi a, hmun tam tak an la let tawh niin a sawi bawk.

Nilaini pawh khan Taliban-ten tun hnaia hma an lak thara province khawpui an lak hmasak pawl, Qala-e-Naw-a sorkar hmun pawimawhte chu an la let.

Share now