Aizawl; Mizoram a jail hrang hrang 10 ah mitang 1,216 an awm mek a, chung zing a mi 49 te chu dam chhung tang tur (lifer) niin, sorkar hnathawk eiruk thubuai vang a tang mi 3 an awm mek bawk. 

Prison department hotute hnen atanga ZALEN thudawn danin, mitang 497 awm theihna Central Jail, Aizawl ah mitang 596 an awm mek a, an zinga mi 160 te chu hrehawm taka tang tura hrem (convict RI) an ni a, dam chhung tang tur mi 49 awmin, mipa vek an ni. Mi 98 tan theihna Central Women Jail (CWJ), Aizawl ah mitang 43 awmin, hrehawm tak a tang tur a hrem mi 9 an awm.  

Mi 113 tan theihna District Jail, Aizawl ah mitang 91 awm mekin, hrehawm tak a tang tur a hrem mi 1 a awm. Tang 183 awm theihna, District Jail, Lunglei ah mitang 117 awmin, mi 7 te chu hrehawm tak a tang tur an ni. 

Mi 95 tan theihna, District Jail, Siaha ah mitang 69 awmin, hrehawm tak a tang tur a hrem mi 3 an awm. Mi 114 tan theihna District Jail, Kolasib ah mitang 81 awmin, mi 130 tan theihna District Jail, Champhai ah mitang 87 awmin, hrehawm tak a tang tur a hrem mi 3 an awm.

Mi 136 tan theihna District Jail, Lawngtlai ah mitang 29 awmin, hrehawm tak a tang tur a hrem mi 4 an awm. Mi 165 awm theihna District Jail, Serchhip ah mitang 39 awmin, mi 114 tan theihna District Jail, Mamit ah mitang 52 an awm.

Central Jail, Aizawl thawktute sawi danin, tun dinhmun-ah sorkar hnathawk eiruk thubuai vanga jail tang mi 3 an awm mek a, chung mite chu mipa vek niin, thiam loh chantir (convict) tawh an ni.