August 10, 2023; Kolasib District Jail-a tang mek, tunhnaia tlanbo Rabul Uddin Lasker (23), Chemphai chu nimin August 9 zing dar 3:20 vel khan Kolasib police te leh Assam police te tangkawp chuan Silchar bulah an man a, District Jail-ah dahluh nghal a ni.

Kolasib SP Lalrinawma Traite sawi danin, Rabul Uddin Lasker an zawnna kawngah hian police ten source an nei tha a, amah man tur hian Kolasib atangin police officer hovin sipai thenkhat an kal a ni.

Assam-ah hian Sonai police ten an lo tanpui bawk a, a chenna nia an hriat atanga man a ni.

Tarlan tawh angin Rabul Uddin Lasker hi ruihhlo (Heroin) vanga Kolasib excise department-in an man niin a dam loh vangin District Hospital Isolation Ward-ah dah a ni a.

Police te venna hnuaiah enkawl ni mahse tun Chawlhni August 6, 2023 chawhma dar 9 vel khan intifai tura a in sawi chu Isolation Ward bathroom-ah a lut a, tukverh thir bar kar atanga chhuakin a tlanbo zui a ni.

Rabul Uddin Lasker hi zawn zui nghal a ni a, police gate zawng zawng pawh khar nghal vek a ni chungin Assam hi a thleng a ni.