April 25, 2023; Nizan khan Lunglei District Jail atanga tlan chhuak tualthah thubuai nei Lalchawimawi (24), Myanmar lam mi, Thangte khua, Lunglei district a awm thin chu Hnahthial leh Thingsai inkar, Khawhri khua-ah man a ni. Tihian jail tang tlanchhuak la man loh mi pahnih an la awm.

ZALEN thudawn danin Lalchawimawia hi khua atanga km 4 velah nizan zanlai vel khan Khawhri khua khawtlang mipui leh Hnahthial police tangkawp ten an man a, mi huan thlam a a mu luhchilh niin, man a ni a, ruahmanna fel tak hnuai a hual beh a nih avangin engmah harsatna thleng lo a man niin, Hnahthial police ten nizan khan la nghalin, Lunglei lamah phurh nghal a ni ang.

Nimin tlai thim hlim vel khan khua tanga km 1 tling lo ah mikhual ke a kal hmu an awm a, a chhak deuh YMA park bulah hmu an awm bawk a, khua a kal pel niin an hria a, Khawhri branch YMA lamin hmalak dan tur an ngaihtuah nghal a, kawng dung a thlam ah te a lo riak thei nia an ngaih a vangin enfiah an rel a, Hnahthial police te nen inrawn tlangin, nizan dar 10:30 vel khan a thei thei an thawk chhuak a ni.

Khua tanga thlam hmasa ber, chul balhla huan an thlenin, mei eng an hmu a, an ringhlel a, thawm dim takin an hual a, tang tlanchhuak ngei a ni tih an chian mai loh avang leh engemaw chetsual palh awm thei a nih avangin fimkhur tak a hualin an veng a, police lam te thil awmdan an hrilh bawk.

Tang tlanchhuak hian thlam panna tur kawngah balhla hnahro a dah a, a fimkhur hle, Hnahthial police an thlen hnuah thlam a a lo mu lai an man zui ta a ni. A lo tang lem lo a, police ten nizan khan an la nghal a, Hnahthial panpui nghal a ni.

Nizan a tlang tlanchhuak an man hi kum 2021 a kum 52 mi, K. Vanlalduati, Lunglei chanmari thattua puh a ni. 

Tihian Lunglei District Jail atanga tang tlanchhuak mi 5 zinga 3 te man an ni tawh a, midang pahnih man loh la awmin, tha thlahlo in an hnuchhui hna polic ten an thawk mek zel nia thudawn a ni.