November 2, 2022; October ni 29, Inrinni zan dar 6 rik hma deuh a Tuirial Airfield venga tuialhthei phur (tank lorry) kang a thi zat chu 5 an tling tawh a, hliam tuar damdawiin a enkawl mek zingah dinhmun ngaihtuahawm zual mi 2 an la awm mek nia thudawn a ni.

Tuirial Branch YMA hruaitute hnen atanga ZALEN thudawn danin, tank lorry kang a hliam tuar zing a tel Moses Lalrintluanga (37) H/o Zatlingpuii, Tuirial chu tukin dar 4:30 khan ZMC ah a boral a, vawiin chhun dar 12 khan vui a ni.

Tuirial leh Tuirial Airfield Branch YMA hruaitute sawi danin, tun dinhmun ah hliam tuar enkawl mek zing a mi 2, Tuirial leh Tuirial Airfield veng mi te chu an dinhmun a tha lo zual a, ICU an enkawl mek an ni.

Media hrang hrang a tarlan tawh angin, tank lorry kan zanah mi 4 an kang hlum a, taxi pakhat leh scooter (scooty) pathum a kang chhe vek bawk. Hliam tuar mi 15 te chu damdawiin hrang hrang, Synod Hospital, Civil Hospital, Aizawl leh Thingsualthliah damdawiin ah te lak an ni. Tank lorry kang a thi te hi Tuirial mi 3, Thingsulthliah mi 1 leh Lamherh mi 1 an ni. 

Hetihlai hian tank lorry khalhtu chu vawiin thlengin man a la ni lo nia hriat a ni.