November 25, 2022; October ni 29, 2022, Inrinni tlai dar 6 rik hma deuh a Tuirial Airfield peng bul a tuialhthei phur (tank lorry) MZ01 W- 3251 kang a hliam tuar zinga mi Sangsawmthanga (45) Tuirial Airfield veng chu nimin khan Synod Hospital, Durtlangah a boral a, hemi nen hian tanker kang a thi zat chu mi 13 an tling tawh.

ZALEN thudawn danin, tanker kanga hliam tuar Sangsawmthanga hi Synod Hospital ah hun engemawchen enkawl a nih hnuin, nimin November ni 24, tlai dar 5:15 khan a boral a, nizan khan lumen niin, vawiin chhun dar 12 khan vuiliam a ni. Sangsawmthanga nen hian tanker kanga thi zat chu mi 13 an tling tawh a, tarlan tawh angin, chhiatna thlenna hmunah mi 4 an kang hlum a, tank lorry bakah taxi pakhat leh scooter (scooty) pathum a kang chhe vek a, a hmun a thi te bakah hian vawiin thlengin damdawiin a enkawl hliam tuar mi 9 an boral tawh a ni.

Aizawl District Bawrhsap Dr. Lalhriatzuali Ralte chuan nimin khan thuchhuah siamin, Petrol/Diesel phur Tank Lorry chetsualna emaw lirthei (Vehicle) chetsualna engpawh a thlen in a rang thei ang berin a chetsualna hmun Local Council/Village Council hruaitute hrilh hriat nghal tur a ni tih a tarlang a, Local Council/Village Council hian an hnaih ber Police Station ah emaw, an mahni bialtu Zonal Magistrate emaw, District Emergency Operation Centre (DEOC) (No. 0389-2317717) ah te a rang thei ang berin an hrilh hre tur a ni. 

Thuneitute lo thlen hma pawhin Village Level Disaster Management Committee/ Local Level Disaster Management Committee ten chhanchhuahna hna thawktute ni lo chu tlawhpawh theih loh turin an lo dang hrang (cordone) thin tur a ni.