Zan khaw tai rek thleng thlenga game khel thinte hian hlawkna an tel em? A then chuan an tel a, a then chu an mit a rim thlawn a - zing an tho tlai thei hle bawk. Zan rei tak tak men ngai ve lo Fantasy Premiere League (FPL) hi i lo hmelhriat ve tawh em, Mizo nula R. Rohlupuii (Hlutei Renthlei) chuan AEROX 155cc a dawn phah der mai! 

English Premier League Season 2022-23 chu zawh fel a ni ta a, Zothan Autoworks (Tata Motors) buatsaih 'Tata Yodha 4x4 Fantasy Premier League' table pawh a hriat ta. He league-ah hian a tawp thlengin mi 3521 lai an tel a, chung zinga che tha ber chu nula a ni tlat mai - tlangval sang telin an tluk tlat lo. 

Hlutei Renthlei hian game 38 khelh zawh hnuah point 2617 a score a, champion niin Rs. 2,00,000 man dawn Scooter manto AEROX 155cc a dawng a ni. Pahnihna chu Kieran tripRIAT niin, point 2613 a score a, Laptop a dawng. Pathumna chu Apuia Zadeng (2610 point) niin Tablet a dawng ve bawk. 

FPL hi chu game dangte ang a ni lo - English Premier League khel palyer te budget awmsa hmanga lei khawma team din tur a ni a, a taka an game khelh atang khan an chet that dan a zirin point an lo score ve thin a ni. Sum awm zat mila player tha lak khawm thiam a pawimawh a, captain thlan fuh a ngaih bakah season tluana chet that a ngai tel bawk. 
  
TATA YODHA 4x4 FPL TOP 3
1st - Hlutei Renthlei (AEROX 155cc)
2nd - Kieran tripRIAT (Laptop) 
3rd - Apuia Zadeng (Tablet)