Aizawl : Mizoram Pradesh Congress Committee Media Department chuan chanchinthar thehdartute an hmachhawn naah kan budget hman mekah thil fuh tawk lo awma an ngaih thu an sawi a, Dy. Chief Minister Pu Tawnluia hmingthatna tur tam tak chu chuhpuitu awmin an hria a, Chief Minister chu duhsak bik neiah an puh.

MPCC Media department chuan, “Kum 2018 December thla atanga MNF Ministry lo din khan minister hrang hrangte hnenah chanvo tha tak tak pek a ni a, minister-ten department lian tak tak an chang vek a, hei hi central sorkar leh state hrang hrang sorkarah pawh kan hmuh tam vak loh a nih avangin mipui pawhin beisei kan nei sang hman hle a ni,” an ti.

Beisei an neih san hle lai hian, budget session puitling hmasa ber atangin heng minister rualte kut hi phuar a ni dawn tih a lang nghal a. Minister thenkhat chan department lian tak takah te chuan sorkar hnathawk hlawh leh sorkar inrelbawlna pangngai bak a taka hnathawhna tur major works head-ah dah a ni ta mang lo. Hei hian department lian pui pui changtu minister-te hnathawk thei loa siam tum a nihzia a tarlang chiang hle a ni, an ti.

Thuchhuah an siamah, MPCC media department chuan, minister thenkhatte leh an department chan a major works, a taka hnathawhna tura dah hi kum 2018-2019 leh 2019-2020 chu a inthlau hle niin an tarlang bawk. Kum kaltaa major works-a Dr. R.Lalthangliana, Cabinet Minister chan Health & Family Welfare-a nuai 3300 dah chu budget tharah hian dah pakhatmah a awm lo a, Commerce & Industries-a kum kaltaa nuai 4500 dahnaah tun tumah hian pawisa pakhatmah dah a ni lo, an ti.

C.Lalrinsanga, Cabinet Minister chan Agriculture bikah kum kalta khan major works-ah nuai 3300 dah a nih laiin budget tharah hian engzat mah dah a ni lo a, Irrigation & Water Resources-ah kum kalta lama nuai 1500 dah a nih laiin tun tumah hian pawisa a dah a ni lo bawk.

Lalruatkima, Minister of State department chan Rural Development-ah sorkar kum liam taah khan major works atan hian nuai 600 dah a nih laiin kumin budget-ah hian pawisa engzatmah dah a ni lo a, Minister of State K Lalrinliana chan Local Administration Dept-ah pawh kum kaltaa nuai 5100 dah a nih laiin kumin budget-ah hian dah a ni lo, an ti.

“Minister thenkhatte hnathawhna tur pawisa pek an nih loh lai hian Chief Minister chan Finance Department-ah ‘Untied Fund’, amah ngeiin ‘a khawnpui’ a tihah chuan cheng vaibelchhe 1220/- (Major Works, Investment, Loan & Advances) zet dah a ni thung a, hei hi Mizoram budget pum pui, cheng Vbch. 10,872 atanga 11.22% zet a ni nghe nghe. Hei hian Chief Minister Pu Zoramthanga’n a minister rualte control a tum dan, amah tlawn thiam apiangte mal a sawm theih dan tur a tichiang hle a ni,” an ti.

MPCC media dept. chuan minister dangten ‘a khawnpui’ atanga pawisa pawtchhuak an la awm an hriat loh laia Robert Romawia Royte-a’n budget session laia ngeia cheng vaibelchhe 11 (Sports-ah nuai 1000, Tourism-ah nuai 100) a pawtchhuak thei chu mak an tih thu an sawi a, “Hei hian minister list siam pawha a tawp bera awm thin Pu Robert Romawia Royte leh CM inkungkaihna that bikzia a tarlang chiang hle a ni,” an ti.

“Robert Romawia Royte hian Dy. Chief Minister Pu Tawnluia ngei pawh a dim chuang lo. High School Field, Zarkawta football field chhawng (Elevated football ground) siam a nih tur thu social media-ah a puangzar a, he field chhawng siam turah hian Sports Minister hian UD & PA changtu Dy. CM, Pu Tawnluia hnenah lawmthu sawi mawlh mawlh tur a nih laiin, Football Field chhawng siam tur thu a sawinaah reng reng Pu Tawnluia hming a sawiri ngai miah lo a, hmingthatna zawng zawng tel tumin a tal vel mek a ni,” an ti a, project liante chu a changtu minister te’n anmahni puanzarah an dah ve duh dawn laia Robert Romawia’n ama tih veka anga a puangzar duh hi MPCC chuan mak an tih thu an tarlang tel bawk.