Aizawl: Zoram Peoples Movement party chuan term exam hun thleng pawha zirlai naupangten zirlaibu an la dawng kim thei lo chu a pawiin vanduaithlak an tih thu an sawi.

Nimin khan Aizawl Press Club-ah chanchinbumite kawmin ZPM General Secretary Media, IT& Publicity Eddy Zosangliana Colney chuan, "Tun dinhmunah Mizoram pumah Samagra Shiksha hnuaia a thlawna zirlaibu dawng tur zirlai naupang nuai khat bawr vel an awm mek a. Zirlai sang telin lehkhabu an la dawng kimlo hi a lung chhiatthlak kan ti hle a, hei hian a lantir chu kan sawrkar hian zirna a ngaihthah hle a. Zirlaibu a thlawna sem tur pawh sem thei lo sawrkar kan nei hi ZPM chuan a vanduaithlak kan ti a. Zirtirtute pawh an hlawh hi May, June leh July (thla 3 chhung) an pe thei lo mek a. Mizoram sawrkarin zirlaite hmakhua, zirna in leh zirtirtute a ngaihthahzia a tilang chiang hleah kan ngai a ni," a ti. 

ZPM GS chuan April ni 5, 2023 daih tawh khan Academic Session tan a ni tawh tih sawiin, July thla tawp, term exam dawn thleng pawha zirlai naupang ten zirlaibu sawrkar atanga an la dawng kim thei lo chu enliam mai mai chi a ni tawh lo tih sawiin, "Sawrkarin chhuanlam hrang hrang siam ve bawk thin mahse, a bul ber chu Mizoram sawrkarin zirlaite hmakhua leh zirna in te a ngaihsak tawk loh vang a ni a. Heng harsatna te hi a rang lama chinfel dan zawng turin sawrkar kan phut a ni," a ti bawk. 

ZPM GS sawi danin tun dinhmunah hian (raltlan tel lovin) Class - IV Hindi sem tur copy 600 velin a indaih lo mek a, Class – VII Mathematics copy 3000 velin an indaih lo mek bawk a. Class – II Mizo (Kumtluang 2) chu copy 1500 vel bawrin an indaih lo mek a. Heng lehkhabu te hi mahni sum senga lei duh pawh awm se, lei tur a awm lo lehzel niin a sawi a. Kum dangah pawh zirlaibu hi a hun taka pek an ni ngai lo tih a sawi bawk.