Meghalaya deputy chief minister, an state home department changtu ni bawk, Prestone Tynsong-a chuan Mizoram Sports Minister Lalnghinglova (Tetea) Hmar ngenna angin an inkawm lai la lain Shillong-a Mizo awmten harsatna an tawh thinte a thlen zui loh nan hma la nghal turin sorkar mi pawimawhte a hrilh nghal.

Tetea hian Thawhtanni chawhma khan Meghalaya Deputy Chief Minister Tynsong hi Shillong-a a chenna inah a kawm a, thil hrang hrang an sawi dun zingah an state khawpuia Mizo chengte chungchang pawh a tel.

Shillong-a Mizo awmten harsatna an tawh thin hi Tynsong hian a lo ngai thutak hle a, an harsatna chin felsak tur leh harsatna an tawh zui loh nan hma la turin an inkawm lai hian phone-in sawrkar mi pawimawhte a hriattir nghal a. Mizo awmten harsatna an neih chuan direct-in emaw, Mizoram sawrkar kaltlangin emaw a hnena thlen thin turin a sawm nghal bawk.

Excise & Narcotics Department changtu ni bawk, Tetea leh Tynsong inkawmnaah hian ruihhlo do kawngah tha taka state pahnih thawhho a tul thu an sawi dun a. A bik takin Myanmar atanga ruihhlo tawlhruk, Mizoram a paltlang hnua Meghalaya-a man awm thin chungchangah inhriatthiam lohna leh harsatna awm lova tlang taka inbiak thin nise an ti.

State pahnih minister inkawmnaah hian Mizoram leh Meghalaya te chu tun hma atanga thian tha an nih thu tar lan a ni a. Tynsong-a chuan Mizoram sawrkar, chief minister leh home minister te duhsakna a hlan thu leh state pahnihte inthian thatna chu chhawmnun zel a duh thu Tetea hi a chah nghal.

Sports minister hi Lalchhanhima, DRC, Mizoram House, Shillong-in a tawiawm a. Dy. chief minister hi Hamletson Dohling, Adviser to CM, Meghalaya-in a tawiawm thung.

Sports Minister hian Thawhlehni vek North Eastern Council Planning Adviser Som Kamei, Financial Adviser Thanglemlian leh Economic Adviser Sherry Lalthangzo te chu an office-ah kawmin, Sports & Youth Services leh a department chan dang, LESDE-a thawhhona awm thei hrang hrangte a sawipui bawk.