National Weightlifting Championship 2023-2024 neih meka Mizoram tana goal medal latu, Jeremy Lalrinnunga chu Nilaini khan sports minister-in a lawmpui a. Rit chawi chak chuan inhliam avanga inbuatsaihna tha a nei thei lo chunga gold medal a la chu a lawmawm zual bik thu a sawi.

Ainawn Veng tlangval hian Itanagar, Arunachal Pradesh-a December 28 atanga Indian Weightlifting Federation (IWLF) buatsaih National Weightlifting Championship 2023-2024-ah hian Senior (Men) kg 67 huangah Pathianni khan gold hi a la a ni.

Kum 21 mi, Mizo weightlifter zinga hriat hlawh ber, Commonwealth Games 2022-a gold medalist hian Snatch-ah kg 136 leh Clean & Jerk-ah kg 162, a vaia kg 298 chawiin Mizoram tan gold medal hi a la a ni.

He huangah tho hian Jeremy-a ang bawka Army Sports Institute (ASI) atanga inzir chhuak, Lalhunthara’n Services hmingin Snatch-ah kg 121 leh Clean & Jerk-ah kg 163, a vaiin kg 284 a chawi a, bronze a la bawk.

Sports Minister Lalnghinglova (Tetea) Hmar-in MINECO-a a office chamber-a lawmpuina hun a buatsaihah hian Jeremy-a chuan inhliam vanga a duh anga training a kalpui thei lo chunga gold medal a la chu a lawmawm zual bik thu a sawi a. A inhliam chhunga fuiha tiphur thintu Mizoram Weightlifting Association (MWA) hruaitute chungah lawm thu sawiin a kal zelna turah sorkar, association leh mipuite tanpuina leh thlawpna a ngen bawk.

Minister chuan, “National level-a champion nih chu thil harsa tak, thawhrimna leh tumruhna nen chauha thlen theih a ni,” tiin Jeremy-a a lawmpui thu a sawi a. Sports chu ‘quota’ tel miah lova Mizoten India rama a ber an nih theihna langsar a ni tih a sawi bawk.

National Weightlifting Championship kal mekah hian Thawhlehni khan Youth (Men) kg 81 huangah Lalruatfela chuan a pum puiah kg 280-a rit chawiin silver medal a la bawk.

Bungzung tlangval, Commonwealth Youth Games gold medalist lo ni tawh hian Snatch-ah kg 125 leh Clean & Jerk-ah kg 155 chawiin a vaiin kg 280 a chawi a. Maharashtra rit chawi chak, Sairaj Pradeshik (Snatch - kg 133 & Clean & Jerk - kg 161, total - kg 294) a tluk phak lo.

Arunachal Pradesh khawpuia intihsiaknaah hian Mizoram atangin rit chawi chak 15 leh official pathum an kal a ni.