Aizawl: Mizoramah kumin January thleng khan HIV/AIDS vei hmuh chhuah mi 27,876 an awm tawh a, thihpui mi 4,005 awm tawhin, HIV/AIDS vei hmuh chhuah tam berte chu thalai, kum 25-34 inkar an ni.

Mizoram State Aids Control Society (MSACS) chhinchhiah danin, Mizorama HIV vei hmuh chhuah tawh mi 27,876 zinga 22,498-te chu ART centre-ah an in-register tawh a, kum kal mek 2022-23 (April - January) thlenga HIV vei hmuh chhuah chu mi 1,783 niin, chu chu thisen endik zawng zawng atangin za a 4.2 a tling.

Tun hnai kum 10 (2013-14 atanga 2022-23) chhunga HIV vei hmuh chhuah tam ber kum chu 2018-19 niin, mi 2,765 hmuh chhuah an awm a, chu chu thisen endik zawng zawng atangin za a 5.7 a ni.

Kum kal mek chhungin nu naupai HIV vei hmuh chhuah mi 133 (0.7%) an awm tawh a,  kum kal ta, 2021-22-ah nu nau pai HIV vei hmuh chhuah mi 177 (0.9%) an awm.

HIV/AIDS kaina tam ber chu mipat hmeichhiatna niin, kum kal mek chhunga HIV vei hmuh chhuah mi 1,783 zinga 1,143 (64.1%) chu mipat hmeichhiatna atanga kai an ni.

Inchiuna hriau inhman tawm atanga kai 586 (32.9%) an awm bawk. 

Kum kal mek a HIV+ve hmuh chhuah zinga a tam ber mi 720 (40.4%)-te chu kum 25-34 inkar an ni a, kum 35-49 inkar mi 564 (31.6%) awm bawkin, kum 15-24 inkar mi 318 (17.83%) , kum 50 chung lam mi 137 (7.68%) leh kum 14 hnuai lam mi 44 (2.46%) hmuh chhuah an awm.