Labour, Employment, Skill Development & Entrepreneurship (LESDE) Department buatsaihin Mizo thalai hnazawng mekte tan, May 9-10, 2023 chhung hian Millennium Centre Roof Top-ah Mizoram Mega Job Fair buatsaih a ni dawn. 
     
Labour, Employment, Skill Development & Entrepreneurship (LESDE) Department chuan hnathawktute  leh kan ram thalaite tan kawng hrang hrang; Labour Laws, Employment, Skill Development leh Entrepreneurship lamahnasa takin hma a la mek a, Department hmalakna kal zelah Mizoram Mega Job Fairhi buatsaih a ni. 

He Mega Job Fair-ah hian LESDE Department chuan ram chhung leh pawna sector hrang hrang atangin company lian leh changtlung tak takte sawm khawmin chung company te chuan Mizoram chhunga hna zawng laite tan hnathawh tur a chhawpchhuahsak dawn a ni.

He Job Fair kaltlang hian hna zawng lai leh company te hian hamthatna insiam tawnin, tualchhunga thalai hna nei lo leh hna zawng mekte hnenah hna nghelnghet leh rintlak zawk tual chhung, ramchhungleh ram pawna an lo hmuh theih nan hun remchang buatsaih a ni dawn.

He Job Fair-a company rawn tel tur thlan chhuah thuah hian teh fung mumal tak hman a ni a. Company te an rintlak dan te, an theihna te leh an changtlunnate hi LESDE Department hian uluk taka a enfiahhnuah thlanchhuah chauh an ni. An registration chungchang thlenga mumal taka enfiah thlap vek an ni. 

He fair-ah hian ram pawn leh ram chhunga Company hranghrang ten heng sector; Financial Institutions, Banking, Healthcare, Services, Automobile, IT, FMCG, Tourism & Hospitality, Beauty & Wellness etc. ah te hian hna thawk tur a chhawp chhuah sak dawn a ni. Hna zawngtu thiam thil bik nei leh nei lem lo te tan pawh a chhawrtu tur te duh zawng mi an nih chuan hna an hmu thei dawn a ni.

He Fair-ah hian Company rawn tel zawng zawngte hian stall hranpa an nei theuh dawn a, chutah chuan hna zawngtu ten an qualification leh an tuina milin an stall hrang hrangte hi an dawr thei awn a ni. Heng Company te leh hna zawngtute hi an inhmuh rem theih chuan a hmun veka hna pek nghal theih an ni dawn bawk a ni.