Nimin zing dar 5 vel khan Zampuimanga thlan piah, tawngtaina hmun bulah saza hliam hmuh a ni a, Vety Doctor thiamten an enkawl zui nghal. Thudawn danin saza hliam hmutu te hian Forest lam an hriattir vat a, Forest bakah ASEP leh Chhimphei YMA hruaitute chu a hmunah hian an thleng thuai a. He saza hi thang awk tal chhuak niin a lang a, a awhna thang hrui tal chatin hun eng emaw chen chu hliam tuarin a lo awm tawh a ni tih a hmuh theih a, a awhna thirzai pawh a nakah a lo la inthlung a. A hliam hi a rei tawhin, a lungte hial pawh a lo awm tawh a ni. He saza hi Aizawl Forest Division lam chuan la-in, Khatla Vety lamah kalpui nghal a ni a. Zoo Doctor John Lalhnuna sawi danin a hliam hi a na angreng hle mai a, theihtawp chhuahin Vety doctor thiam dangte nen enkawlin a dam leh theih an beisei phawt a ni. Doctor ten an en dan a zirin a buaipui zel dan tur chu la kalpui zel tur a ni. Zalen thudawn danin saza hi sahuan lamah phurhthlak phawt a ni a, Thawhtanni hian College of Veterinery, Selesihah kalpui a enkawl tum a ni. Saza hliam hi a na hle a, a damchhuah lehna chance pawh hi 50/50 niin an sawi a. Thang awhna hliam hi thla khat kalta vela mi niin an ring. Nimin zinga saza hi Durtlang khama khawsa saza chu a ni lo nia hriat a ni.