ZALEN August 19, 2023: HRD Board Vice Chairman leh Lengteng bialtu MLA ni bawk Dr. L.Thangmawia chuan nimin khan Health Clinic Centre (HCC), Kawlkulh North hawngin thawktu Health Worker leh IV Grade te MLA Fund-in a rawihsak nghal.

Hawnna inkhawm tawi neihah thusawiin Dr. Thangmawia chuan Lengteng bial khua Health Sub-Centre awmlohna zawng zawngah Health Clinic Centre sawrkar-in a hawng kim ta chu thil chhinchhiah tlak leh lawmna tham a ni tiin khawtlang hruaitute leh MLA-in an dilna ngai pawimawh a mipuite mamawh em em HCC hawnsaktu Health Department chungah lawmthu Lengteng bial mipuiten kan sawi mawlh mawlh a ni, a ti.

Health Clinic Centre, Kawlkulh North atan hian Kawlkulh PHC Staff Quarter hman lailawk a ni a, bungraw mamawhte MLA Fund hmang a lei fel an ni tawh a, SASCI 2023-24 sum atangin HCC building thar sakna tur cheng nuai 15 ruahman fel a ni tawh bawk a ni.