Aizawl: Nimin khan Book Cafe, Chanmari-ah Mizo tawng lehkhabu thar 'Mizo Tawng Ri Ziarang' Dr Laltleipuii, Asst Professor, ICFAI University ziak chu Human Resources Development Board Vice Chairman L.Thangmawia'n a tlangzarh.

Tlangzarhna ah hian thu sawiin Thangmawia chuan Mizo tawng zirna kawnga tangkai tak tur lehkhabu thar a lo chhuak chu lawmawm a tih thu a sawi a, he lehkhabu thar hian Mizo tawng hmasawnna kawngah mel lung thar Zofate min phunsak a ni, a ti. UNESCO in kum 2016 a tawng ral mai thei a tihchhuahte zingah Mizo tawng a tel thu sawiin tan lak theihna hrang hrangah Mizo tawng hmasawn nan ke kan pen a tul thu sawiin, Chief Minister Zoramthanga thupek angin Mizoram sawrkar chuan Mizo Language Board din turin chak takin hma a la mek a ni tiin kum thar 2022 Assembly Session hmasa bera he bill put luh a nih theih nan Human Resources Development Board chuan chak takin  hma a la mek a, Mizo Language Board din a nih theih chuan Mizo tawng humhalh bakah tihhmasawnna kawngah a tangkai hle dawn a ni, a ti bawk.

Lehkhabu tlangzarhna hun, sawm bik mi tlemte telna hi Lalrammawia Ngente, Associate Professor, Govt Johnson College chuan kaihruaiin inlawmna thu a sawi a. Lalzarzova, Asst Professor, MZU Mizo Deptt. chuan lehkhabu thlirlawkna (Book preview) hun hmangin he lehkhabu ziaktu Dr Laltleipuii chuan Mizo tawng hmasawn nan Linguistic lamah tanlak a tul thu sawiin tuna Mizo tawng chungchanga kan inhnialna tam tak hi linguistic atangin  chinfel theih a ni tiin lehkhabu chhuah a nih theih nana puitu zawng zawngte chungah lawmthu a sawi bawk.

He hunah hi Mizo Academy of Letters (MAL) Secretary Prof. Rualkhuma Colney leh Mizo Writers' Association(MWA) President R.Lallianzuala ten hmanpuiin pawl aiawhin  thu an sawi bawk.