Aizawl: Commerce & Industries Minister Dr. R.Lalthangliana chuan Union Minister of State for External Affairs & Education Dr. Rajkumar Ranjan Singh chu Bangladesh nena ramri a insumdawn tawnna kalpui a nih theih nan hmalakpui turin leh Mizoram University Southern Campus din anih theih nan theihtawp chhuahpui turin a ngen.

Higher & Technical Education  Minister ni bawk Dr. R. Lalthangliana leh Union Minister of State for External Affairs & Education Dr. Rajkumar Ranjan Singh te chu Zirtawpni khan Hotel Floria ah inkawmna tawi an nei a, Dr. R. Lalthangliana chuan thla hmasaa Bangladesh Commerce Minister Tipu Munshi a Mizoram a lo zin tumah Bangladesh leh Mizoram ten ramri a sumdawnna an kalpui theih nana thil pawimawh tih hmasak ngai chungchanga thuchhuah intawm an siam chu Union Minister hi hrilhin India lamin tih tur a nei ve nual a, hengte hi Ministry of External Affairs chan lam anih avangin he thuchhuah intawma India tih turte chu ngai pawimawhsak turin leh tihhlawhtlinsak ngei turin a ngen a. Mizoram University Southern Campus Lunglei chu Ministry of Education-in a thuphungin din phalna pe mahse hemi atan sum ruahman a awm loh avangin MZU Southern Campus  din chungchanga MZU lamin hma an lak theih loh thu hrilhin MZU Southern Campus din anih theih nan Education changtu anih angina theihtawp chhuahpui turin a ngen a. Hemi bakah RUSA chungchang pawh Union Minister hi sawipui a ni. 

Union Minister of State for External Affairs Dr. Rajkumar Ranjan Singh chuan Prime Minister Narendra Modi’n a Arunachal Pradesh leh Ladakh ramri a cheng mipuiten ni tin khawsak harsatna avanga an khuate an rauhsan thin chu a vei avangin tunhnaia ramri a khua te hi a ngaih pawimawhin, inkalpawhna leh an hmasawnna chungchanga hmalakna te a sawi a. New Education Policy 2020 chungchang, a bik takin zirna in sang zawk leh zirna sang zawkte tihchangtlun sawrkarin a tum dante sawiin National Higher Education Commission kaltlangin thil tam tak ruahman mek a ni, a ti a. Mizoramin insumdawn tawnna chungchanga sawrkar laipui puihna a ngen te, MZU Southern Campus chungchangte chu a lo en tur thu Dr. R. Lalthangliana chu a hrilh a ni. 

Meeting-ah hian Principal Secretary, Higher Education Dr. Esther Lalruatkimi chuan Dr. Rajkumar Ranjan Singh chu Hmarchhak state zawng zawngte chuan hetiang dinhmun sang tak a chelh avangin an ngaihsan leh an chhuan hle thu a sawi bawk. Dr. R. Lalthangliana hi Commerce & Industrial Development Board Vice Chairman K. Laldawngliana MLA in a tawiawm a ni.