Aizawl: ZPM Chairman Lalliansawta chuan, “Sakhaw tih bik nei ten rorelna an chan hi kan ram tan a him loh avangin party nihna dah thain ZPM leh Congress te hi kan thawkho ta a ni,” a ti.
ZPM hruaitu hian nimin khan Aizawl Press Club-ah chanchinthar lakhawmtute kawmin an thawhho chhan a sawifiah a. “India ram Constitution thuhmahruai a sakhaw zalenna ‘Secularism’ tih a awm hi keiniin lawmawm kan tih tehlul nen Hindu lalram din tumtu te chuan hnawk an ti em em a, Parliament leh Rajya Sabha-ah an tam zawk hun hunah ‘Secular’ tihte hi paih thuai thuai an nghakhlel em em a ni,” tiin a sawi a.
Kawng hrang hrangin Kristiante chungah kum tinin tuarna a pung tih sawiin 2018-ah Biak In suasam tum 34 ngawt a thlen hman thu leh kumin thla 3 lek chhungin nasa takin a pung leh mek bawk niin a sawi a ni.
Sawta chuan, “BJP-te hian Mizoramah tan an la mek a, keimahni leh kan thlah lo awm zel tur te tan, tuna party a kan tihphung leh nghet taka kan vawn tlatte hi mahni hmasial taka chelh tlat loin kan tan tlan a ngai anih hi tiin ke kan pen a, kan lo thawkho ta a. Keini pawl pahnihte chauh ni loin Zoram mipui zawng zawngte BJP leh a thawhpuite ni lo lamah vote thlak theuh turin kan sawm a ni,” a ti bawk.