English-ho hian football hi an ta neih a, an chin chhuah leh thehlar pawh a ni a, dan leh dun pawh anmahni atanga chhuak deuh vek a ni a. Yellow leh red card pawh anmahni atang tho a ni a; mahse, a bul chu traffic light atang daih a ni!

1966 Fifa World Cup-a England leh Argentina inkhelh tum khan England defende Jack Charlton-a chu German referee, Rudolf Kreitlein-a’n a chet dan avangin a vaukhan (book) a. Inkhelh zawhah Charlton-a hian hetih laia World Cup referee chief Ken Aston-a chu a pisaah hmuin chanchinbu atang chauhvin referee khan a vaukhan a ni tih a hriat thu a hrilh a.

Hemi tlaia Wembley Stadium atangin Lancaster Gate Aston pana a inkhalh pahin Aston-a chuan Charlton-a’n khelmuala a chunga thil thleng kha a hun laia a hriat thiam loh thu a sawite chu a ngaihtuah zui nauh nauh va.
Kensington High Street-a kawngpui intawhkhawmna laia rawng hmang (colour-coding)-a lirthei tlan thunnunna, traffic light-in din tura a tih avanga a din lai chuan traffic light ang bawka eng tawng hmang pawhin an hriat thiam theih tur, rawng hmanga khelmuala player-te thunun dan tur leh entute hmuh theih tur chu a rilru-ah a awm ta a ni.

“Heti hian ka ngaihtuah ta a, ‘Yellow chu zaidawh zawkin; Red chu ding rawh, i tawp thei’ tihna atan,” tiin a hnuah Aston-a hian a sawi leh a ni.

In a thlen veleh a thil ngaihtuah chu a nupui, Hilda-i a hrilh vat a, ani chu pindan dangah tlan lut vatin minute reilo te hnuah construction paper hmanga siam ‘card’ pahnih, kawr ipte-a leng tawk chiaha siam nen a lo kir leh ta a, hei hi vaukhanna atana yellow card leh hnawh chhuah hriattirna atana red card lo chhuahna a ni ta a. Mexico-in 1970 World Cup an thlen tum khan hman a ni ta a ni.

Card system chu infiamna dang – rugby, water polo leh a dangah pawh lak chhawn zel a ni ta a; mahse, a awmzia erawh a inang lo hret hret thung.

Zirtirtu leh sipaiah pawh tang tawh, English referee Aston-a hi football tan a thawh hlawk hrim hrim a, league referee zinga kawr dun leh a vara tial ha chhuaktu leh tilartu a ni.

Chhum zing phui chukin London khawpui a bawh lai pawha hmuh awlsam tur atan linesman-te flag pawh rawng lar, a eng leh a sen hman tantirtu a ni a. Rawng inang lo hret hret awm mah se tun thlengin hetiang tawng hi hman lar a ni ta nghe nghe.