Thazual Award sem zawh a ni ta

Admin - Nov 14, 2021

Gospel bik hi Ningani zan khan sem niin, Zirtawpni zan khan Lengzem sem ve leh

Zonet ten kumtina an buatsaih Thazual Award vawi 7-na chu sem zawh a ni ta a, Gospel leh Lengzem-ahte then a ni. Gospel bik hi Ningani zan khan sem niin, Zirtawpni zan khan Lengzem sem ve leh a ni. 

Lengzem huangah hian Best New Artist atan zaithiam thang duang tak Siampuii Ralte chu thlan a ni - a phu e. Hetih lai hian nikum Krismas dawn atanga hla rawn lar em em mai 'Kan Khua' tih Rebecca Lallawmsangi sak chu Song of The Year atan thlan a ni. 

Siampuii Ralte a vul
Show tan phat atangin boruak a hot a, mit leh beng a tlai nghal hle. Category hrang hrang zingah Best New Artist sem hmasak ber a ni a, nominee tha tak tak zingah Siampuii Ralte a chungnung ber. 

Siampuii Ralte hian award dang a dawng tel bawk a, Jt. Production nena an thawhdunna 'Ka hmangaihte' tih hla hmangin Best Group/Duo an la a ni. Lengzem huangah chuan award pahnih la thei awm chhun a nih bakah, a perform bawk avangin a tan chuan zan chhinchhiah tlak tak a ni ngei ang.

Hei le mi thar chu
Kumin Thazual Award-ah hian kum danga la lang ngai lo mi thar hmuh tur an awm nual a, chung zinga pakhat chu C. Lalremruata a ni. Ani hi Gospel leh Lengzem huangah a lang ve ve a, a phu ang ngeiin award pawh a humhaw e. 

A hla hit em em mai 'Sulam Lenmawi' chu Gospel huangah Best Music Video dawng thei tur zingah chhawpchhuah niin, a video hmuhnawm tak hi Chiangte Videography kutchhuak a ni - award dawng loin vanduai zingah an tel hlauh. 

A la tawp mai lo - Lengzem lamah C. Lalremruata bawk kan hmu leh a, a perform bakah award a hum haw ta nge nge. Best Mizo Traditional Artist atan thlan a ni a, award dawn lawm nan a hla hit 'Sulam Lenmawi' hi a perform bawk.
Kuminah hian kum danga kan la hmelhriat loh mi thar rawn inlar dang leh chu Reuben Lalmalsawma a ni. Ani hian Kimkima music video 'Hmangaihna Rimawi' chu siam sakin, Lengzem huangah a vawi khat nan Best Music Video award an hlawh chhuak - mut theih lohna tham a tling.

Jaui hla sak 'Mangtha' phuahtu Hmachhuana Khiangte hnenah Best Songwriter hlan a ni a, ani pawh hi Thazual Award bikah chuan mi thar a ni.  

Benjamin Sumchu hei le...
'Chhing mitin biahthu kan hlan' tih hla hmanga Zoram dung leh vang rawn deng chhuaktu Benjamin Sum chu Best Male Artist atan thlan a ni a, a phu leh phu loh chu mipuiin an pawmpui leh pawmpui loh a ni ang. 

Benjamin hi thlalai zingah a tlana hle a, award a dawng pawh hi a mak lo - award sem zana a perform pawhin lawm a hlawh hle.        

Hmeichhe lamah Thazual Award-a a perform pui turu lutuk avanga lar zui ta Zaii Hauchhum chu Best Female Artist atan thlan a ni a, kuminah pawh a perform pui leh pek hle - a style dangdai leh aw pui lutuk chu a champion pui a tih theih awm e.  

Kan Khua = 10 million views!
December 8, 2020 khan hla Krismas hla danglam tak mai 'Kan Khua' tih chu YouTube-ah upload a ni a, a maka makin a hit! Krismas hla kan neih tawhte ang lo takin a thluk leh a hla thu a dangdai a, thlalai lam rilrem zawng tak a lo ni - mi maktaduai 10 chuang zetin an view tawh! Mizoram mihring awm zat atanga chhut phei chuan turu tak a ni. 
He hla ngei mai hian phu takin Song of The Year award a hlawh chhuak a, a satu Rebecca Lallawmsangi pawh a lawm ngei mai. He hla hi Peka Fanai phuah niin, award ceremony chhim hian Rualalung atangin a rawn kal vang vanga dawh sanah lawmthu sawina hun a nei thei kha a lawmpuiawm hle. 

7th Annual Thazual Award hi Dawrpui Multipurpose Centre-ah sem niin, stage a changtlungin hmasawnna tam tak hmuh theihin a awm. 

7th Annual THAZUAL AWARD 2021 WINNER

Lengzem
𝐁𝐞𝐬𝐭 𝐍𝐞𝐰 𝐀𝐫𝐭𝐢𝐬𝐭 - 𝐒𝐢𝐚𝐦𝐩𝐮𝐢 𝐑𝐚𝐥𝐭𝐞
Best Mizo Traditional Artist - C. Lalremruata
Best  Music Video - Reuben Lalmalsawma 
Kimkima ‘Hmangaihna Rimawi’
Song of The Year - Rebecca Lallawmsangi ‘Kan Khua’
Best Female Artist - Zaii Hauchhum ‘Nghilh har Di hmasa’
Best Songwriter - Hmachhuana Khiangte - Jaui ‘Mangtha’
Best Male Artist - Benjamin Sum ‘Chhing mitin biahthu kan hlan’
Best Group/Duo - Jt. Production ft. Siampuii Ralte ‘Ka hmangaihte’

Gospel
Best Male Artist - Amtea
Band of The Year - The Prophets
Best New Artist - HC Lalramchhani
Best Female Artist - Maruati Hnamte
Best Group/Duo - Jerry & Benjamin Colney
Best Songwriter - Fela Hnamte ‘A nung ka hria’
Best Music Video - Moonshine Studio
Jerry & Benjamin Colney ‘Mak tak leh hlauhawm taka duan’
Song of The Year - Maruati Hnamte ‘Ka thinlungah a nung’

Share now