He tawngkam ‘An American Dream’ tih hi i hre ve tawh ngei thinin ka ring. Hmânah The Dirt Band pawn an hla thupuia hmangin an sak kha. American-ho ang tho khuan hnam tin hian duhthusâm leh tum ram—lei pialràl emaw vàn pialràl emaw kan neih theuh ka ring. Keini Mizo pawn kan nei ve—chu chu ‘The Mizo Dream’ tiin ka’n dah ve ngawt a ni.

Hmânlai chuan kan pî leh pûte khan Pialràl kai thei tûrin ‘Thangchhuah’ ngei an tum thin. ‘Ka len hunah chuan Pasaltha ka la ni ngei ang; sa lû pawh a tam thei ang ber ka la là dawn a ni; sa-pui pawh a tam thei ang ber ka kâp ang a; kan kawngka lú hi sa chi tin kî intlar phei tuarin an la màwi ngei ang. Sa lû mai bâkah mi-lû pawh ka la ve ngei bawk tûr a ni. Buh leh bãlah pawh, khaw khat buh thar hnem ber zîngah ka tel ang a; Thangchhuah tûrin khuang pawh ka cháwi ngei dâwn.

Khawtlângah tlâwmngai thanin ka thang ang a; tin, hmeichhia pawh ka “thei” ngei bawk ang,’ tih te kha ‘The Mizo Dream’ a ni thin.

Vawiinah erawh ‘The Mizo Dream’ a lo dang ta! ‘Lehkha ka zir chho zêl ang a; eiru pha chin sorkar hna sâng thawk ngei tûrin ka intât hriam ang. E, politics-ah sum a tam ber… zâwk takina! Chhûngkaw chàwm nân mai bâkah vua leh vãng vulh nân a tha ber. Ka lût ngei tûr a ni. Unit level atanga tanin atang berah ka tang ang. Mite hriat ka lo hlawh a, ka lo hming that deuh hnûah Block level-a OB ni pha ngei tûrin YMA emaw Kohhran emawa inhman a tangkai dâwn riau … tlat ina. A tha thei ang berin that ka chhuah char char ang a, hmingthat leh làr a pawimawh dâwn tlat. Chuvâng chuan peih leh theih vâng pawh ni loin ka hun leh tha mai bâkah ka sum sèn pawh ka inhuam tûr a ni.

‘Chhûngkua maw? Aw… nakina “lal” ka la nih dâwn avângin ka kalsan lo thei nâng! Thaibawi anga ka lan a, chhûngkua ka uap reng ten engtin nge Block level hruaituah ka tlin theih ang a, engtin nge khawtlângin min hriat ang a, “fel” min tih tehlul ang? A màwlthlâk lutuk! Block OB ka lo nih chuan contract neuh neuh chu… awlsam tawh dâwn tlat. Tin, Minister leh MLA hmêlhriat, a tam thei ang ber neih tum tûr a ni ringawt. An hnathawh that leh that loh lam ngaihtuah aia pawimawh zâwk chu an mahni biak that kha a ni zâwk! An hnathawh that leh that loh lo sawi ve chiam chiam te chu a… âtthlâk lutuk! Tichuan, party office lama ka tlangnèl hnûah headquarters lama luh dân tûr ngaihtuah leh; a dawt leh chu MLA ticket chan dân kawng ngaihtuah… ni tawh mai dâwn a ni!’ tih te hi ‘The “Tûnlai” Mizo Dream’ a lo ni ta! A va rapthlâk ta êm!

Sorkar hnâ thawk nih pawn in leh lo tha, car chhuak thar ber ber nei zêl thei tûr khawpa sorkar hman tangkai thiam nih a ‘intihlen’ te; fate tâna bike chhuak thar leh chak tha ber leisak thei ngei tûra sum nei té táw nih te; fa te hming kima smartphone chhuak thar leisak thei nih te chu kan ‘awhzâwng’ a lo ni ta zêl a.

Social Media lama ‘Thangchhuah’ pha chin nih kan tum fur ta! Facebook lama Friend request dawng thei tawh loh khawpa friends ngah nih te; Instagram lama followers maktaduai nei pha chin nih te; eng vak ni dawn chuang loa lehkha zir vak vak aia YouTuber niha video upload-ho monetized a, Mizo zînga viewer ngah ber ber zînga tel phâk nih a, a dollar ang zâwnga mahni in lum atanga sum hai luh hiau hiau te chu, kan ‘dream’ a lo ni ta a.

Kohhrana inhman pawn, ‘nihna khí’ thleng pha ngei tûra thahnem ngaih te; College zirlai nih pawn Students’ Union hruaitu, zirlaipuite sum thawhkhâwm ei pha chin nih te; zir lai zir zawh hnûah pawh, Zirlai Pâwl hruaitu ni ngei tûra ‘ram hmangaih vak’ te leh thil dang dang—‘mi dang tân’ ni lo, ‘mahni tân’ vek a lo ni ta—‘The “Tûnlai” Mizo Dream’ chu!

A va râpthlâk ta êm! Kan ‘Thangchhuah’ tum dân a dang zo ta! Hawh u, i harh ang u. Hetia ka sawi chiam avâng hian kan chhe ta vek tihna erawh a ni hauh lo; he hnam hi a la chhe vek lo a, a la boral lo. Thinlung chhûng ril taka Zoram vei a, siam that duh tak tak thinlung pû, he ram hian mî a la kawl a nia.

Social media khawih lo ngam zirlai; hlêp chu sawi loh mahni sum pawh sèn belh inhuama contract hnà thawk ngam contractor; Central Service-a India rama mi chal lang nih phâk tum zirlai; infiamna lama khawvêl dêng chhuak thei nih tuma a sûr a sâ pawi sa loa rim taka bei tauh tauh thin te leh kawng hrang hranga hlawhtlinna belhchiandâwl chan tum Mizo thalai he hnam hian a la nei … mahse, an tlêm ta êm a ni!

Vanlalsailova hla kha a dik a ni; ‘The Mizo Dream’ khâr nân ka’n saktîr ang e…
Hnam inchei dan, kan khawsazia
Rethei leh hausa inkâr a hlat tawhzia te,
Oh… oh… oh… A nei nung nung a fêng chhîng chhîng,
A nunzia reng hmuh hmaih leh si a
Tunge mawhphur ang?
Aw! A pawi em! An liam zêl si
Zoram siam tha a, tung ding tur hian
Tu dang an ngai lo, keinin Phengphe khua a tlai hma hian, i bei zêl ang.
Zoram tang fan fan, Zoram tang fan fan
Hun a liam a hma hian