Inthlan
Pathianni tlai khan Election Commission of India chuan Lok Sabha inthlanpui neih hun tur a puang a, Mizoram ah chuan inthlan hi April ni 11,2019 (Ningani) ah neih a ni ang.

Vui
Zonet Cable TV Private Ltd bultantu leh engkima sulsutu zinga mi, Managing Director ni lai RK Lianzuala (53) h/o Tabith Laltlanchhungi, Bethlehem veng chu Inrinni chawhma dar 11:35 khan cancer vangin Ebenezer Hospital-ah a thi a, Pathianni khan vui a ni.

Rel
Pathianni zana tiak ta Mizoram Baptist Kohhran rorelna sang ber, BCM Assembly rorel inkhawm chuan Kristiante hunpui, Krismas leh Good Friday bawh buai thei zawnga programme siam lo turin Central sawrkarah ngenna thlen turin an rel.

hrilhfiah
Mizoram Chief Electoral Officer Ashish Kundra chuan Thawhtanni khan a pisa-ah Political Party hrang hrang aiawhte kawmin Mizorama Lok Sabha MP thlanna leh Aizawl West-I Assembly Constituency by-election neih hun tur leh hemi atana political party te lo inbuatsaih dan tur te a hrilhfiah.

MZP in rel
MZP Executive meeting Thawhtanni a neih chuan March, 2019 thla chhung hian Bairabi, Zophai hmuna Zofate Chawlhbuk sakna tur enfel turin Bairabi, Zophai hmunah kal nise tiin an rel.

Rap puak
Thawhtanni zing dar 7 vel khan Lawngtlai District, Chakma Autonomous District huamchhung Bangdukbanga khuaa cheng Biranda Kumar chuan rahpuah bomb (land mine) rapin, hliam na tak a tuar.
Lalut
Thawhtanni tlai dar 4 khan Raj Bhavan Durbar Hall-ah Governor Prof. Jagdish Mukhi chuan C.Lalsawta, IAS (rtd) chu Lok Ayukta Chairman atan rinawmna thu tiamtirin a lalut.

Phut
Central YMA chuan Thawhtanni khan thuchhuah siamin Assam Rifles luah ram chhunga LSC petute chhuichhuak a, na taka hremna pek an phut tih an sawi.

PM hlan
Joint Action Committee on Inner Line Reserved Forest chuan Assam in a enkawl mek Inner Line Forest Reserve chu Mizoram kuta hlan letleh tura ngenna ‘memorandum’ chu Thawhtanni khan Prime Minister hnenah an hlan.

Session
Thawhlehni khan ni 8 chhung awh tur Mizoram Legislative Assembly session chu neih tan a ni a, session tanni ah hian Larsap Prof. Jagdish Mukhi chuan thu a sawi.

Candidate
BJP Mizoram State President, Prof. JV Hluna chuan Thawhlehni khan press mite kawmin Lok Sabha inthlan lo awm turah leh Aizawl West I Legislative Constituency Bye election neih turah official candidate an nei dawn tih a sawi.

Zeng danna
Health & Family Welfare Department bultumin Thawhlehni khan Mizoram puma naupang kum 5 hnuailam zawng zawngte tana zenghri Venna Vaccine pek runpui chu tan a ni.

Tlawh
Mamit DC Dr Lalrozama chuan Thawhlehni khan Tripura Transit Camp-a Reang (Bru) ten kokim zawk leh boruak ralmuang tak hnuaia vote an thlak theihnan Kanhmun khua-a Special Polling Station siamna tur hmun hma tlawh.

Puang
Nilaini khan MNF Party chuan April 11, 2019-a Lok Sabha MP candidate atan C.Lalrosanga leh Aizawl West I bial by election a an party candidate atan Zothantluanga (Valtea) te an puang.

Duh lo
NGO Co-Ordination Committee Nilainia thukhawm chuan Bru te tan special polling station siam sak tawh loh nise an duh tih an sawi.

Thukhawm
Nilaini khan Durbar Hall, Raj Bhavan ah Mizoram Governor Prof. Jagdish Mukhi leh Mizoram sawrkar hnuaia venhimna hna thawktute an thukhawm.

Candidate
Congress leh ZPM chuan Ningasni khan mipui candidate tur an puang a, an candidate atan hian Lok Sabha ah Lalnghinglova Hmar (Tetea), Aizawl Venglai niin, MLA bye-election-ah Lalbuanga Sailo, Chawnpui an ni.