Rural Bank luangchhuak

Aizawl : Mizoram Rural Bank chuan Corporate Social Responsibility (CSR) kaltlangin March ni 31, 2026 khan Computer 32, printer 4 leh Smart Interactive Board pakhat chu hmun li ah an hlan. CSR kaltlanga Mizoram Rural Bank luan chhuahna hi Rs.19,94,220/- man hu zet a ni.

  He hunah hian Computer Set 24 leh A3 printer 1 chu Industrial Training Institute, LESDE Department ah hlan a ni a. Computer set te hi ITI-a Mechanical Engneering, Electrical & Electronics Engineering kaihhnawih Simulation atana hman tur a ni.

  Mizoram Journalist Association (MJA) te hman turin Computer set 5 an hlan bawk a. HATIM (Higher and Technical Institute of Mizoram), Pukpui, Lunglei hnenah Smart Interactive Board (65 inch) an hlan a, SP Office, Champhai a hman turin Computer Set 3 leh Printer 3 chu an hlan bawk a ni.

Police kut atangin heroin man

Aizawl : Excise & Narcotics Department chuan April 2, 2026 khan Kolasib-ah Heroin thahnem tak an man.

  Excise & Narcotics Department chuan April ni 1, 2026 (Nilaini) chawhnu dar 2:00 khan Kolasib Khuangpuilam-ah Heroin Kg 1 & gram 252 (Hawng 100) leh a neitu nia puh mi pahnih – Patrick Ramhmingthang (44) s/o Lalmawizual, Mualvaiphei, Manipur leh Samson Lalremruat (24) s/o Dohmingthang, Parbung, Manipur nia inchhalte an man. Heroin phurhna atana an hman lirthei, Mahindra Scorpio (Regn No. MZ02-6979) pawh hrensak nghal an ni.

  Heroin te hi Manipur atanga an lak, Silchar lama hralh tum mek lai a ni. He case-a man Patrick Ramhmingthang hi Manipur Police thawk mek lai a ni nghe nghe.

Saza kap a puh, a sa rep lo kawltu man

Aizawl : April 1, 2026 khan Aizawl Forest Division hnuaia Saitual Forest Range RO leh thawktuten Mualpheng khuaah Saza kap a, a sa rep te lo kawl tua puh mi pakhat an man. 

  Saitual Forest Range thawktute chuan an report dawn bawhzuiin pawikhawihtua puh chenna in hi an dap a, Saza sa ni ngeia rin hrang 39 leh a thin Kg chanve an man sak. He pawikhawihtua puh man hi hemi ni vek ni April 1, 2026 hian District Court, Aizawlah thubuai siamsak nghal niin, Judicial Custody ah dah nghal a ni.

  Saza hi Wildlife Protection Act, 1972 hnuaia Schedule 1 ramsa zinga mi a ni a. Schedule 1 ramsa te hi a lo tihlum emaw, a sa hrim hrim - a rep leh rep lo pawh - lo kawl emaw, Satlaw chhar emaw pawh nise hremna lungin - Kum 3 aia tlemlo, Kum 7 thleng tan theihna leh pawisa cheng 25,000/- thleng chawi theihna a ni. 

Khelo India medalist-te lawmpuina hun hmang

Aizawl : Sports & Youth Services Minister Lalnghinglova Hmar chuan April 2, 2026 khan Khelo India Tribal Games 2026 a Mizoram tana weightlifting a medal la mi pariatte chu MINECO-a a office chamber ah lawmpuina hun a hmanpui.

  Khelo India Tribal Games (KITG) 2026 hi March 25, 2026 atanga April 3, 2026 chhungin Chhattisgarh a Raipur, Jagdalpur leh Surguja ah te neih a ni a. Hetah hian India ram state hrang hrangte infiamna chi hrang pasarihah inelna neih niin Mizoram hian football, hockey, weightlifting, wrestling leh athletics-ah te infiammi 69 a tir a ni.

  Mizoram in KITG 2026-ah hian inelna dangah silver medal pahnih leh bronze medal hnih te la tawh bawkin tun dinhmunah a pumpuiah pasarihna an hauh.

Ruihhlo man cheng nuai 1300 chuang man hu hal ral

Aizawl : April 2, 2026 khan Krishi Vigyan Kendra (KVK) Khawzawl-ah, Khawzawl District Drug Disposal Committee te bultumin September 2025 atanga February 2026 chhunga ruihhlo man te halralna hun hman a ni a, Bawrhsap K. Vanlalthiana’n a hmanpui.

  Drugs halral te hi Methamphetamine 20.743 kg, Rs. 11,99,15,000/- man hu te, Heroin (No 4) 582 grams, Rs. 1,14,19,000/- man hu leh Ganja 1.868 kgs, Rs. 9,340/- man hu te a ni a. Hemi kaihhnawih ah hian Khawzawl Police Station-ah case 9 ziah luh niin mi 17 man an ni. Vawiin a Drugs halral zawng zawng hi avaiin Rs. 131,343,340/-man hu a ni.

CM-in Dialysis Unit thar a hawng

Aizawl : Chief Minister Lalduhoma chuan April 1, 2026 khan Serchhip District Hospital-a Dialysis Unit thar a hawng.

Serchhip District Hospital-a Dialysis khawl hi 2025 ah an dawng a, thawktu Doctor 1,Technician1, Staff nurse 2 leh RO incharge 1 in an enkawl dawn a. 2.4.2026 atangin dialysis hi tih tan nghal a ni a.

  Khawl 2 hmangin, chawhmaah mi 2 leh chawhnu mi 2 a vaiin ni khatah mi 4 an enkawl thei dawn a. Chawlhkar khatah mi pakhat tan vawi 2 a tih theih dawn a ni. Sawrkar chawlhah leh thla tin Inrinni vawi hnihna an awl thin ang. Natna khirh bik Hepatitis leh HIV veite erawh chu a hranpaa enkawlna pek ngai an nih avangin dialysis hi an tih sak thei rih dawn lo a ni.

MISA General Conference 2026 hman a ni

Aizawl : Mizoram Information Service Association (MISA) chuan I&PR Conference Hall, Lianchhiari Run-ah April 1, 2026 khan 2026 MISA General Conference an hmang a. IPRP&S Department Secretary Betsy Zothan­pari Sailo chuan khuallian niin a hmanpui.

  MISA General Conference hi chawhma lamah hawnna hun hman niin, nikum lama MPSC buatsaih Civil Services Combined Competitive Examination-a lut thar MIS officer-te lawm luh nghal an ni a. Chawhnu lamah rorelna leh MJA General Headquarters hruaitute kaihhruaiin 2026-28 atana MISA hruaitu tur thlanna hun hman nghal a ni.  President - Malsawm­sanga, Vice President - Pratab Chhetri, General Secretary - Andrew H. Lalremruata, Secretary- Dr. Lallawmkima Thangluah, Treasurer - C. Lalremruati leh Fin Secy - Emily Lalrinpuii te an thlang.

Chief Minister-in Chhiarpui 2027 inziahluhna bul tan

Aizawl : Chief Minister Lalduhoma chuan a chenna inah April 1, 2026 zing khan Census of India 2027 Phase-I (Houselisting leh Housing Census) self-enumeration hlawhtling takin a nei a. India ram Chhiarpui 2027 Mizorama bul tanna a ni.

  Chief Minister hi Directorate of Census Operations, General Administration Department leh Aizawl Municipal Corporation officials pawimawhten an tawiawm a. Chhiarpui an kalpui zuina turah duhsakna a lo hlan a ni.

  Census of India 2027 hi thawh hniha kalpui tur a ni a. Thawh hmasa zawk Houselisting leh Housing Census hi vawiin April 1, 2026 atanga tan a ni. Thawh hnihna Population Enumeration hi February 2027-ah neih tan tur a ni ang. Tun tum census hi digital hmanga census kalpui hmasak ber tur a ni dawn a, mahnia Self-Enumeration tih theih a ni.

Aieng Metric Ton 71 (KG 71,600) vailiam

Aizawl : MzSRLM hnuaia din Ropuiliani Women Farmer Producer Company Limited (FPC) chuan a shareholders te tharchhuah Aieng Metric Ton 71 (KG 71,600) Kolasib leh Mamit District atanga a leisak chu March 31, 2026 khan Lalmuanpuia, District Mission Director/Project Director, DRDO Kolasib District chuan Kolasib DC Office Complex atangin a vailiam.

  Khuallian Lalmuanpuia chuan Mizoram State Rural Livelihoods Mission (MzSRLM) hnuaia agri-marketing value chain atana din Ropuiliani Women FPC in Kolasib leh Mamit District huamchhunga a shareholders te hnen atanga a leisak Aieng MT 71 zet, SSB AGRO LLP, Mizoram hnena hralhchhuah a ni chu lawmawm a tih thu a sawi.

Tourism & Sports Minister-in ADB hotute kawm

Aizawl: Tourism leh Sports and Youth Services Minister Lalnghinglova Hmar chuan March 30, 2026 khan New Delhi-ah Asian Development Bank hotute nen an inkawm a, sports leh tourism hmasawnna tura ADB atanga tanpuina awm theite an sawi a; Finance Ministry lam nen an inkawm bawk.

  India rama ADB hotu lu, Country Director Mio Oka hoin Lalnghinglova Hmar hi an lo dawngsawng a. Tourism Minister hian Mizorama tourism leh Sports lama hmasawnna thleng mek thantir zel tur leh tourist thahnem zawk dawngsawng thei turin state budget ringawt a tawk lo a, Externally Aided Project kal tlanga ADB atanga loan mamawh a nih thu a sawi.

  Sports pawh intihhlimna satliah ni loin eizawnna a ni a, India sawrkar pawhin a dah pawimawh. Infrastructure piah lama infiammite tihmasawn tura man power development lama kal nat an duh a, ADB puihna an mamawh hle a a ti bawk; sports tourism chu state tana sum lakluhna tha a nih theih thu a sawi lang.