Nuai 15,000 zet inbumna-ah chargesheet thehlut

Aizawl : Nuai 15,000 zet tling car loan inbumna Mahindra & Mahindra Financial Services Ltd. sum tih chingpenna lian berah police lam chuan CJM Aizawl hnenah July 15, 2024 khan Chargesheet pahnih, phek zathum (300) chuang chu he pawikhawihnaa a bultumtu Jakir Habibur Hussain leh a thurualpui mi 19 lakah an thehlut

   Mizoram atang chuan Nuai 15,000 car loan inbumnaah hian car dealer CK Motors Hyundai, NBE Tata, Rafael Nissan leh Aidu Motors Renault te chu chiang takin an inhmanhnawih niin police thuchhuah chuan a tarlang.

Vbc. 1 chuang hu heroin leh a neitu a puh man

Aizawl : July 15, 2024 khan Special Narcotics, CID (Crime) leh Assam Rifles ten mi pakhat kut atangin Rs. Vbc. 1.02 hu heroin an man.

   CID (Crime) leh AR te hian heroin hi Sesawng, Aizawl district ah an man a, sahbawn bawm 12 a dah niin, gram 146 niin, international market rate ah Rs. 1,02,20,000 hu a tling.

Zirlaibu chungchangah Edu minister hmu

Aizawl : 18.7.2024 khan MPYCC hruaitute chuan School Education Minister an hmu a. Sawrkar school zirlaibu indaih lohnaah a rang thei ang bera hma la a, lehkhabu nei kim lote hnena pe vat tura ngenna an thehlut.

   MPYCC thuchhuah a tarlan a nih danin, ni 15.7.2024 (Thawhtanni) atang khan Mizorama school te chuan term exam hmasa ber an tan a. Hetah hian sawrkar sikul (Primary & Middle, Govt. Aided) zirlaibu la dawng kim lo school 1270 chuang an la awm chu Mizoram zirna sawpchhiatna nasa tak a thlengah Congress Thalai chuan an ngai a ni.

Mizo zinga phir damlai upa ber ten an kum 90 na piancham lawm

Aizawl :18.7.2024 khan July 18, 1934 a piang, tuna Mizo zinga phir la dam upa ber nia hriat Phirdailova leh Lalchhingpuia, Mission Veng te chuan an piancham vawi 90 nâ an läwm.

   Phira leh Lala te hi Rohnuna leh Rualchhingi te inkarah Mission Veng, Aizawl-ah an piang a, an piantirh atangin Aizawl an la pemsan lo a, Mission Veng an la khawsa ngar ngar a ni. Phira hi Boys M.E School ah a thawk thin a, Lala hi AIR, Tuikhuahtlangah a thawk thin thung a ni. Hriat theih chinah India rama phir unau dam rei ber ni a hriat an ni.

MSPMC-in sawrkar project enfiah

Aizawl : 16.7.2024 khan Mizoram State Project Monitoring Committee chuan Upgradation of Cardiology Department, Civil Hopital, Aizawl ; Construction of AYUSH Development Centre, MINECO leh Establishment of Veterinary Information & Resource Centre, Khatla sak hna kal mek chu an endik a. MSPMC Team-te hi R. Lal Rinawma, IRS (Rtd.), Vice Chairman hovin an thawkchhuak a ni.

   Cardiology Department tih changtlunna hna kal mek khawl hman mek suan mai na tur hmun awl remchang a awm loh avanga hnathawh kawnga harsatna an tawk a, sum release har avanga harsatna an tawh te sut kian dan tur sawiho a ni.

Pineapple Bonanza 2024

Aizawl : Mission Organic Mizoram (MOM) leh Clover Organic Pvt. Ltd. te bultum, Mission Organic Value Chain Development for North Eastern Region (MOVCD- NER) kaltlanga Khawzawl District chhunga lakhuihthei chingtu intelkhawm pawl - Tuichangral Organic Farmer Producer Company Ltd. te lakhuithei thar zawrh chhuah runpui 'Pineapple Bonanza 2024', Millennium Centre kawtzawla buatsaih chu July 18, 2024 khan Agriculture & Farmers Welfare Minister PC Vanlalruata'n a hawng.

   Tuichangral Organic Farmer Producer Company Ltd. hi Mission Organic Value Chain Development for North Eastern Region (MOVCD- NER) hnuaia loneitu intelkhawm pawl Farmer Producer Company (FPC) niin, August ni 16, 2021 ah MOVCD- NER Phase lIl (three) hnuaia din a ni a.

Minister pahnih leh Dy. Chief Whip ten enfiah

Aizawl : July 15, 2024 khan PHE Minister Prof. Lalnilawma, Aizawl West II bialtu, Sports & Youth Services Minister Lalnghinglova Hmar leh Deputy Govt. Chief Whip W.Chhuanawma te chuan Vaivakawn - Zohnuai a lei tla hniam avanga harsatna thleng chu a hmunah kalin an enfiah a. Harsatna tawk chhungkua te nen inkawm hona hun an hmang.

   PHE Minister Prof. Lalnilawma chuan Vaivakawn Zohnuai kawng tla hniam avang a chhungkaw engemaw zatin harsatna an tawk chu pawi a tih thu sawiin chhiatna nasa zawk a thlen loh nan mithiam rawn chung a ruahmanna siam a nih tur thu a sawi a. Minister Lalnghinglova Hmar chuan chhawmdawl leh thawmthat hna thawhna turin Aizawl District Disaster Management Authority, Public Works Department leh Public Health Engineering hotute hnenah harsatna chungchang thlen a nih tawh thu a sawi.

Union Minister of State-in Vety College tlawh

Aizawl : Union Minister of State for Agriculture and Farmers Welfare Bhagirath Choudhary chuan July 18, 2024 khan College of Veterinary Sciences & Animal Husbandry (CVSc& AH), Central Agricultural University (CAU), Selesih-a Teaching Veterinary Clinical Complex (TVCC) leh Department of Veterinary Microbiology a tlawh.

   Minister hian College-in an sak thar Sales Booth leh College-in kum 25 an tlin hriatreng nana lung an phun Silver Jubliee Monument-te a hawng a, College Community Hall-a exhibition buatsaih a tlawh bakah loneitute leh ran vulhtute nen inkawmhona hun an hmang bawk.

Governor- in NHIDCL hotute thil pawimawh sawipui

Aizawl : Governor Dr Hari Babu Kambhampati chuan NHIDCL- Regional Office Aizawl hotute chu July 18, 2024 khan Raj Bhavan-ah meeting a neih pui.

   He hunah hian NHIDCL ten Mizoram chhunga National Highway siam hna hmun 8 a an neih chungchangte Power Point Presentation hmanga thlirho a ni a. NHIDCL hotute hian kawngpui pawimawh tak Vairengte – Sairang leh hmun danga hna thawh theih a nih loh chhan te an sawifiah.

Bairabi atanga Sairang inkar Rel kawng siam mek tlawh

Aizawl : July 16, 2024 khan Lok Sabha MP Richard Vanlalhmangaiha chuan Bairabi atanga Sairang inkar Rel kawng siam mek hmasawnna thlen tawh chin a hmunah tlawhin hnathawh tawh chin leh hmabak la awm te a enfiah.

   Rel kawng enfiahna hunah hian Lok Sabha MP leh Hortoki Railway Station a Officer te chu inkawmhona neiin Rel kawng enkawltute chuan an hnathawh dan tlangpuite leh harsatna awm te MP hnenah hian an lo thlen a. MP chuan rel kawng in hma a sawnna a taka hmu chu lawmawm a tih thu sawiin thawktu te theihtawp an chhuahna zarah chak takin hma a sawn a ni, a ti.

Working Committee-in Lengpui Airport endik

Aizawl : July 18, 2024 khan Lengpui Airport kal zel dan tur ngaihtuahtu ‘Working Committee’ chuan Lengpui Airport-ah Chairman TBC Lalvenchhunga, Adviser to Chief Minister (Finance & Planning) hovin hmun pawimawh te an tlawh a, hmalak zel dan tur an sawi ho bawk.

   Working Committee hian July 31, 2024 ral hmain Sawrkar ah Lengpui Airport kal zel dan tur rawtna (recommendation) an theh lut ang. Chairman hian a hmunah Lengpui Airport hna kal lai mek te a en dik nghal bawk.

Eco-Herbal Garden din

Aizawl : Mizoram Pollution Control Board leh State Medicinal Plants Board, Mizoram, Directorate of AYUSH tangkawp chuan Govt. J. Thankima College Northern Campus Durtlang hmunah July 19, 2024 khan ‘Eco-Herbal Garden’ an din a.

   He hunah hian Govt. J. Thankima College Eco-Club zirlaite chu ramhmul damdawi thatna leh chin uar a pawimawhna zirtir an ni. Ramhmul damdawi chi hrang hrang - Neem, Tejpatta, Sunhlu, Aloe vera, Kumtluang, Rûnhmui, Archangkâwm leh a dangte phun a ni a, he Eco-Herbal Garden hi Govt. J. Thankima College Eco-club-te’n an lo enkawl chhunzawm dawn a ni.